Tourism Minister-in Imaginarium 2.0 hmanpuiin Mizoram-ah an event neih te nghat turin a sawm
Nimin khan Guwahati-a Mayfair Spring Valley Resort-ah ni hnih awh ‘Imaginarium 2.0 - North East Events & Entertainment Leaders' Summit’ chu zawhfel niin he hun hi Tourism Minister, Lalnghinglova Hmar chuan a hmanpui a, he hunah hian Tourism Minister Lalnghingl;ova Hmar chuan Mizoram-in Tourism-ah theihna sang tak a neih thu sawi thin a nih thu sawiin, “Tunah chuan a taka chantir a hun tawh. Mizoram tlang leh ruam mawi, lui leh boruak thiang takah in Event neihte rawn nghat ula, lawm takin kan lo thleng ang che u.” tiin he huna Event Management lama mi lian kalkhawmte chu a sawm a. Mizoram chu hmun kilkhawr a ni tawh lo tih sawi chhunzawmin, “Mizoram-ah Rel a luh tawh avangin awlsam leh tlawm zawkin a zin zung zung theih tawh a, Thlawhna phei chuan India ram hmun hrang hrang atangin darkar reilote ah a thlen theih.” tiin, Event Tourism chu a thlengtu tan a hlawk a, eizawnna tam tak siam theitu a nih avangin Mizoram pawhin nasa lehzualin tan a la dawn tih a sawi a ni.
North East-a Event, Tourism, Hospitality leh Entertainment Industry a mi pawimawhte intawhkhawmna lian, ‘Imaginarium 2.0 - North East Events & Entertainment Leaders' Summit’ hi Inrinni atang khan neih niin nimin khan chhunzawm a nih hnuah zawhfel a ni a, India rama event leh entertainment industry a mi pawimawh tak tak ten India hmarchhak State te event tourism-a hma an sawn theih dan tur hrang hrang an ngaihtuah a. He hunah hian Mizoram in tourism event leh festival lian thleng tura theihna a neih that zia, sawrkarin event tourism hmasawn nana hma a lak dan leh Mizoram Tourism Calendar te Video Presentation hmanga enho a ni a. Video hi Mizoram Tourism Department leh I&PR Department te tangkawpin an siam niin, Mizoram tlawh chhan tur hrang hrangte mawi taka tarlan a ni bawk.
Nimin-a ‘Imaginarium 2.0 - North East Events & Entertainment Leaders’ Summit’ ah hian Tourism Minister hi Tourism Department-a Deputy Director Dr. R. Lalrinchhani leh Assistant Tourist Officer LV. Lalawmpuii ten Mizoram atangin an tawiawm a ni.