Post Matric Scholarship sum account-ah lut mek

Tunlai hian Post Matric Scholarship sum chu zirlaite account-ah a lut mek a, harsatna dang a awm loh chuan tun thla chhung hian a luh kim vek beisei a ni.
Mizoram Scholarship Board thawktute sawi danin Scholarship sum thun hi Central lam tih anih avangin engzat nge lut tawh a, mi engzatin nge la dawng lo tih chiang takin an hre mai thei lo a. “Kan hriat dan chuan pawisa hi zirlaite account-ah a lut mawlh mawlh niin kan hria a, hetihlai hian la dawng lo pawh an awm mai thei a. Harsatna dang a awm anih loh chuan tun thla chhung hi chuan a luh kim vek kan beisei a ni,” an ti. Hetihlai hian zirlai Scholarship dil zingah mahni Bank Account leh Aadhar thlunzawm (seed) lo bakah hun rei tak account khawih che lo chuan harsatna an tawk thei tih MSB hotute chuan an sawi bawk.

Mizoram zirlaite tana Post Matric Scholarship sum hi June 23, 2026 khan sawrkar laipui atangin cheng nuai 40775 dawn a ni a, Mizo-ram sawrkar tum ve tur nen a vaiin nuai 5000 chuang deuh pekchhuah a ni dawn a. Scholarship dil hi mi 32852 an awm nia thudawn a ni.