PMKVY 4.0-a Mizoram State Special Project hnuaiah mi 2,584-in training zo

Sawrkar laipui Ministry of Skill Development & Entrepreneurship PMKVY 4.0 kaltlanga Mizoram State Special Project hnuaiah nikum 2025 khan Mizo thalaite kutthemthiamna zirtirna (skill development)-ah thalai 2,584 in training an zo.

Labour, Employment, Skill Development & Entrepreneurship (LESDE) Department atanga Akashvani News Aizawl thudawn danin, PMKVY 4.0 hnuaiah Mizoram sawrkara sum hmuh cheng vbc. 1.96 sengin kum 2025 chhung khan kutthemthiamna chi hrang 11-ah thalaite tan Training an buatsaih a, Mizo thalai 10,220 te kutthemthiamna zirtirna tura a duan Mizoram State Special Project atan hian Ministry of Skill Development & Entrepreneurship chuan PMKVY 4.0 hnuaiah cheng vbc. 31.06 a ruahman a; he project hnuaiah hian training tura inziaklut thalai 4,454 zinga 2,584-in an training chhuak a ni.

Mizoram State Special Project kalpuitu LESDE Department hotute chuan, Mizoram State Special Project kaltlang hian thalai 2,584 chu kut hemthiamna lam hna chi hrang hrang 11 zirtir an nih thu an sawi a; training senso atan sawrkar laipui atangin cheng vbc 2.47 hmuh a ni a, hemi atang hian cheng vbc. khat leh nuai 96 chu hman niin project hi zawh a ni tawh a ni.

Thalaiten kutthemthiamna hna an zir hrang hrangte chu - Baking Technician/Operative, Nail Technician, Electrician, Physical Education Assistant (Primary Years), Beauty Therapist, Housekeeping, Professional Makeup Artist, Geriatric Caregiver (Institutional & Home Care), Electrical Technician, Emergency Medical Technician-Basic, Food & Beverage Service - Associate, Fitness Trainer, Data Entry Operator (Divyangjan), Craft Baker, Mobile Phone Hardware Repair Technician, Processed Food Entrepreneur leh Plumber General-te a ni a; training chhuak mi 2,584 te hnenah hian certificate pek vek an ni.