Chief Minister in Document dik lo hmanga Family Pension la mek te bansan turin a ngen
Dan dik lova Family Pension la ten sawrkar-a an Pension Payment Order pe kir tura hmalakna bultanna, Statewide Kick-off Programme on 'Sensitization of Voluntary Surrender of Pension Payment Order' (PPO) chu nimin khan Aizawl-a Assembly Annex Conference Hall-ah neih niin he hun a hmanpuina ah hian Chief Minister Lalduhoma chuan pensioner te an duhsak thu sawiin, “An pension benefit te, Family pension te hi tha tak leh tluang takin la se kan duh. Pension First Formulation pawh kan chingfel hnem tawh a ni. Pension tihfel mai thei loh tam takte hi an thawhna Office lama an pension file khawihtuten training an neih that tawk loh vang a ni fo tih kan hriat avangin chung mite zirtirtu tur Training Wing siam tumin hma kan la mek a, an vanglai hun zawng zawng sawrkar tana hmang raltute hi kan zah a ni,” a ti a. Hetianga pensioner-te an duhsak em em lai hian Family Pension hi mi engemaw zatin dik lo takin an la nia hriat a nih thu sawiin, “A then hi chuan tum reng vangin document lem hmangin an la nia an lan laiin mi tam tak hi chuan an hriat loh vangin an lo la an ni thei bawk a. Hetianga dik lo taka sawrkar sum luanral tirna hi tihtawp kan tum a ni,” a ti.
Chief Minister chuan he hmalak bultanna atan hian mahni duhthu ngeia PPO pekkirna hun chu thla thum (3) chhung an hawng mek tih sawiin, “Document dik lo, dawt behchhana Family Pension la ten anmahni duh thu ngeiin bansan (surrender) se kan duh a. He hun hawn chhunga pe kirte chu an sum lo lak tawhte kan chhuh dawn lo va, kan ngaidam dawn a ni. Ngaihhnathiamna hun a ral hunah kan Task Force ten pension latute zawng zawng hi kal chilhin, a hmuna endikna an nei leh dawn a. Dik lo taka pension la an hmuhchhuahte chu kan tihtawpsak bakah hremna pek kan tum a ni,” a ti a. “Mi in dik lo taka Family Pension a lak theihna bul hi document lem a ni thin a. Document issue tute hi an pawimawh hle. Birth Certificate/Marriage/Divorce/Non-Marriage/Life Certificate/Income Certificate/Ration Card leh Pension lakna atana document-te chu an rinhlelhawm nia kan hriat chuan kan chhui zui zel tawh dawn a. Document issue tute hi lo fimkhur se kan duh,” tiin a tul chuan an umzui tur thu a sawi bawk.
Mizoram sawrkar hnuaiah pension benefit dawngtu hi mi 39,954 an awm mek a, heng zingah hian Superannuation pension la mek 22,139 leh Family pension la mek 11,194 an awm a. Pension chi dang latu Centralised Pension Processing Centre (CPPC) kal tlanga la 5629, Voluntary 594, VRS 289, Invalid 69 leh Compulsory mi 40 te an awm a ni.
Sawrkar chuan dik lo taka Family Pension latute tan mahni duhthu ngeia sawrkara pekkir (surrender) na hun July ni 1, 2026 atanga September ni 30 chhung a hawng mek a, hemi hun chhunga pe kir lote dapchhuah hna hi thawh chhun-zawm a ni ang a, document lem hmanga hetiang thil tih tumna hi a awm zui zel loh nan awareness kalpui a ni bawk ang.
Nimin-a he hmalakna bultanna hawnna hun hi Finance Department-a Secretary Ramchuana chuan kaihruaiin Finance Department changtu Commissioner & Secretary Vanlaldina Fanai chuan inlawmna thu sawiin, Jennifer HL Duhawmi, Addl. Secretary chuan report a pe a, Adviser to CM (Finance & Planning) TBC. Lalvenchhunga pawhin khual zahawm nia he hun hi hmanpuiin, “Pension payment hi kan Revenue Expenditure lian ber a ni tawh a. Dan ang taka miin a lak chuan kan lawmpui a, kan duhsak a, dawt leh document dik lo behchhana sawrkar sum dik lo taka latute erawh hi chu en liam mai chi a ni lo,” a ti bawk.