Serchhip District-ah 'Project Thaichhawninu' kalpui turin tlangzarh a ni
Serchhip District-a 'Project Thaichhawninu' tlangzarhna hun hi nimin khan Serchhip Kawnpui VC Hall-ah neih niin Women &Child Development-a District Program Officer, Lalthlamuani Rokhum chuan a tlangzarh a. Hmeichhe naupangte tana hamthatna tur, Project Thaichhawninu chu Mizoram puma kalpui turin June ni 16 khan Social Welfare, Women & Child Development Department changtu Minister, Lalrinpuii chuan a lo hawn tawh thu leh Mizoram District 11-a RD Block 27, ICDS huamchhung khaw hrang hrangah te kalpui tura ruahman a nih angin Serchhip District-ah Post Office te nen chak taka kalpui tum anih thu a sawi a. He Project hming ‘Thaichhawninu’ hi Mizo thawnthu pakhat Mauruangi leh Bingtaituki te thawhnthu atanga lak a nih thu sawiin, Mauruangi nu-in rethei tak chung pawha a fanu tana a inpek ang khan tunlai nu leh pa ten Sukanya Samriddhi Account hmangin an fanute hmakhua atan an inpek ve theih nan he Project hi duan a nih thu a sawi bawk.
.jpeg)
Serchhip District-a Project Thaichhawninu' tlangzarhna hun hi District Mission Coordinator, Lalvensanga chuan kaihruaiin Serchhip Post Office-a Sub-Postmaster, Lalsailova Sailo chuan Sukanya Samriddhi Account chungchang a sawifiah a, zawhna leh chhanna hun hman nghal niin Specialist in Financial Literacy, V. Lalruatsangi chuan lawmthu sawiin hun a khar a ni.
Beti Bachao Beti Padhao Flagship hnuaia Women & Child Development Department leh Mizoram Postal Division tangkawp hmalakna, 'Project Thaichhawninu' hi Sukanya Samriddhi Account hawnga kalpui tur a ni a. He Project hnuaiah hian hmeichhe naupangte chu Post Office leh State Bank of India kaltlangin account hawnsak theih an ni anga, he hmalakna hi India Sawrkar Laipuiin India ram a hmeichhia Pasal nei tur hautak lutuk avanga hmeichhiate harsatna leh hmeichhe fa tihtlak emaw, thah emaw tihbo nan a duan a ni a, Hmeichhe naupang kum 10 hnuailam tan niin Unau pianghmun (nu leh pa inang) atangin mi pahnih aia tam a theihloh thung a. Naupang in pawisa dahsaktu (guardian) a nei tur a ni a, Guardian emaw account neitu naupang a thih chuan account chu tihtawp theih a ni dawn a ni. He Account-ah hian Nitin/kartin/thlatin/kumtin duh duh zat pawisa dahluh theih niin kum khat chhungin Rs. 250 aia tlemlo dahluh a ngai thung a, Account hawn ni atanga kum 21a tlin pumhlum hunah khar tur a ni. Hmeichhe naupang kum18 tlin hnuah zirna chhunzawm duh vangin account-a pawisa awm atangin a chanve lakchhuah phal a ni bawk.