Mizoram Peace Accord chu inremna danglam bik leh chhinchhiah tlak tak a nih thu Larsap in a sawi
Zoram Research Foundation leh Aijal Club ten Remna Ni kum 40 tlinna, Ruby Jubilee puala ‘From the Frontlines of '66 to 40 Years of Peace’ tih thupui hmanga nimin-a BSI Hall, Aizawl-a hun an buatsaih a hmanpuina ah Larsap General (Dr) Vijay Kumar Singh chuan kalkhawmte Remna Ni chibai bukin, Mizoram Peace Accord chu inremna danglam bik leh chhinchhiah tlak tak a nih thu a sawi a. Mizoram Peace Accord-in kum 40-na hmel a hmu leh ziah a nih hnuah Mizoram-ah engmah buaina a awm leh tawh ngai lo chu ropui a tih thu sawiin, “Remna leh muanna a awm theih nan mitinin tha an thawh avangin he inremna hi Mizoram mipui zawng zawngte ta a ni,” a ti a. Mizoram Peace Accord chu inremna, hruaitu tha leh mipui sawrkar siam tura intiamna a taka puitlinna a nih thu sawiin, “Hei hian kum 20 ram buaina a titawpa, remna, nghehna leh hmasawnna a rawn her chhuah tir a ni,” a ti a. Mizoram Peace Accord chu Northeast bakah khawvel puma inremna thuthlung entawntlak tak ti a hriat a nih thu sawiin, Mizoram mipuite chu hlut thiama chhawmnung zel turin a chah bawk a ni.
He hunah hian Larsap chuan ‘The Case Study of the Enduring Legacy of the Mizo Peace Accord’ tih Project chu tlangzarhin khawtlang tihmasawn turin mahni Inlum-a awm reng lova hawiher tizau tura State pawna vahchhuah tam a tul thu sawiin, kalkhawmte chu hmun dang atanga thiamthil zira thian siam turte, ngaihtuahna thar leh tha zawk neia State leh mipuite hmasawn nana ngaihtuahna seng turin a chah bawk.
Nimin-a he hun hman ah hian chawhnu lamah ‘Frontlines of the Past : Conversation with Veteran Press Corp’ tih thupui hmangin hun hman chhunzawm a ni a, mithiam hrang hrang ten hun an hmang a ni.