Falkawn-ah Tuikum MLA Khualbuk hawn a ni
Falkawn-a Zairemmawia building-a MLA Khualbuk hawnna hunah hian Tuikum Bialtu MLA PC. Vanlalruata chuan ZMC chu hmun hrang hrang atangin kan pan khawm nasa em em tih sawiin, “Synod Khualbuk leh Homestay hrang hrang awm mah se kan in daih lo hle mai a, MLA Khualbuk hi kan Bial Manifesto-ah khan kan telh sa ni a, tuna a hlawhtlinna hmel kan hmu theihna tura theihtawp chhuahtu ka thawhpuite chungah lawmthu ka sawi duh a ni,” a ti a. “He Khualbuk hi ruak reng se, damlo te hi awm lo ila tih hi kan duhthusam a ni a, mahse damlo kan lo awm a nih pawhin an tan samkhaina a thlen ngei kan beisei a ni,” a ti a. A remchan dan a zirin hmun danga riahna nei remchang lo tan pawh he Khualbuk hi a in hawng reng tih sawiin, “He Khualbuk hi mi rethei harsa zawk leh damlo natna khirhkhan tak tak neite tan mal-sawmna lo ni se la, he In neitu ten phal taka min luahtir avang hian lawmthu ka sawi,” a ti bawk.
He hun hi Tuikum Block ZPM President PC. Lalhruaitluanga chuan kaihruaiin ZMC Falkawn-a Chaplain, Rev. Lalbiaknia chuan Hunserh a hmang a, ZPM Block Secretary Rochanhlua chuan Report a pe bawk. Tuikum MLA Khualbuk hi damlo inentir leh a buaipuitute tan a thlawnin a thlen theih dawn a, Khum hi Double pahnih leh Single pariat a awm a, a luah man senso hi bialtu MLA hian a tum dawn a ni.