SPAB leh SWAB Chairman ruat thar sawifiahna siam

Mizoram sawrkar Finance Department chuan thuchhuah siamin State Purchase Advisory Board (SPAB) leh State Works Advisory Board (SWAB) Chairman ruat chungchang an sawifiah.

Hemi chungchanga thuchhuah an siamah chuan State Purchase Advisory Board (SPAB) leh State Works Advisory Board (SWAB) Chairman atana Commissioner & Secretary/Secretary, Finance Department ruat a nih chungchang ah Social Media leh hmun dangah thu belchhian dawl lo leh rintlak lo sawi leh thehdarh a awm tih tarlangin, Chairman kalchhuak ta Chief Secretary chuan Chairman thlak dilna chu Chief Minister hnenah May ni 7,2026 khan ziakin a thehlut tih an tarlang a. He a lehkha thehluh ah hian Chief Secretary chu sawrkarah Chief Vigilance Officer (CVO) a ni angin SPAB/SWAB thil tiha thil fello a lo awm a, a hnena thlen a nih chuan chung thil fello an rawn report-te lo enfiahtu tur a ni tih tarlangin, a lo enfiahtu tur ber Board Chairman-a a awm tlat chu a remchang lo a tih thu an tarlang.

Hei bakah hian a lehkha thehluh ah hian, “General Financial Rules 2017, Rule 173(xxii)-ah chuan Purchase Committee member tumah member dang chunga hotu bera a nih a remchang lo tih ziahlan a ni a. Board member-te hi a a hnuaia mi an nih vek avangin an tan zalen taka ngaihdan sawi a harsat phah thei tih hriain he dan tlawhchhan hian Chairman a nihna hi thlak a dil bawk,” an ti a. Hna lian thamte chu Finance Department remtihna chauha thawh an nih avangin SPAB/SWAB-te hi Commissioner & Secretary/Secretary Chairman-na hnuaia din turin Chief Secretary chuan rawtna a siam nghal bawk niin an tarlang a. Hetianga Chief Secretary-in ziaka Chief Minister hnena Chairman thlak rawtna a thlen hi May ni 18, 2026-a Council of Ministers meeting-ah ngaihtuah pawm a nih thu pawh an tarlang bawk a ni.