Mihring hmanga sumdawnna do turin Human Trafficking Interception Project hawn a ni

Mihring hmanga sumdawnna do turin Oasis India chuan nimin khan Sairang Railway Station-ah Human Trafficking Interception Project an rawn hawng.

Human Trafficking Interception Project hi Sihhmui Village Council President, Lalthlengliana chuan hawngin ram lian zawka thil thleng tura ngaih thin chu Mizoram chhunga ngeia a dona tur programme hawn a ngai ta chu hmalakna tha tak a nih rualin thil lungchhiatthlak tak nia a hriat thu a sawi a. Thawktute hmalakna chu khawtlangin a thlawp tlat dawn tih sawiin, an tanpuina an mamawh a nih chuan inthlahrung miah lova hrilh thin turin a chah a. Sawrkar a ni emaw, Company a ni emaw, hmun hrang hrangah ram tana hnathawk an awm thin tih sawiin, “Tih tak takna tel lova a hminga thil tih a awm thin a, helai hi chu kan rilru ah lang lo se, kan inpe ta sa sa a nih chuan theihtawpin, tih takzet in kan ram, kan hnam tana ding turin kan in sawm a ni,” a ti bawk.

He hunah hian Oasis India Executive Director, Mangneo Lhungdim chuan Oasis India chu London-ah kum 38 kaltaa tan a nih thu leh India ramah pawh kum 30 chhung a kal tawh thu a sawi a. An thawh ber chu mihring hmanga sumdawnna do leh hetiang tuartute chhanchhuah leh enkawl a ni tih pawh sawiin, Inkalpawhna lama hmasawnna ruhrel lian hrang hrangte chu mihring hmanga sumdawnna thlenna hmun anih avangin inbuatsaih a pawimawh thu a sawi a. Kohhran, YMA, MHIP leh khawtlang mipuite thawhpuina an mamawh thu pawh sawiin, theihtawpa tangruala mihring hmanga sumdawnna do puiah a sawm nghal bawk a ni.

Sairang Railway Station-a Human Trafficking Interception Project hawnna hunah hian Sihhmui MHIP President Laldawngliani chuan mihring hmanga sumdawnna chungchang chu Sairang Rel Chawlhhmun a lo din tirh khan an ngaihtuahnaah a awm thu leh eng angin nge hma an lak ang tih an ngaihtuah ve thin thu sawiin, tuna hmalakna chu an thlawp thu a sawi a. Sihhmui MHIP President chuan Sairang Police te chu tlem an tih thu leh an indaih lo hle ni-a an hmuh thu pawh sawiin, Rel Station-a duty turin sawrkarin Police dah belh thei se a duh tih a sawi bawk.

Sairang Rel Chawlhhmun-a Oasis India in Human Trafficking Interception Project an hawn hi hmarchhaka State-a a pathumna a ni a. Kamakhya Railway Station leh Dimapur Railway Station-ah te an lo hawng tawh a ni.