Lirthei enfiah runpui neih ah mi 650 man an ni tawh

Tunhnaiah Aizawl khawpui-ah sawilawk lova lirthei enfiahna chu Traffic Police ten tum hnih neiin mi 650 man an ni.

Aizawl Traffic Police-a Addl. SP Saidingliana Sailo chuan lirthei chetsualna hrang hrang laka mipuite leh lirthei khalhtute an him zawk nan tunhnaiah Aizawl-ah lirthei enfiah runpui neih thin a ni tih a sawi a, tunhnaiah sawi lawk lova lirthei enfiahna hun hi Pathianni-ah tum hnih leh zan reiah tum hnih an neih thu sawiin, hengah hian a vaiin mi 650 manin an vaia pawisa chawi tlingkhawm chu Rs. 4,54,000/- a nih thu a sawi bawk.

Aizawl Traffic Police Addl. SP Saiding-liana Sailo chuan Mizoram-a lirthei chetsual chhan tam ber chu fimkhur loh vang a nih thu nimin-a Akashvani News in a kawmnaah Aizawl Traffic Addl. SP Saidingliana Sailo chuan Mizoram chhunga lirthei chesualah a lirthei chiangkuan loh vang chu a awm mang loh thu sawiin, lirthei tha pangngai, a khalhtu inthlahdah leh fimkhur tawk loh vang a nih tlangpui thu a sawi a. Lirthei tlan chak lutuk chu lirthei chetsual chhan zinga a langsar deuh a nih thu a sawi a. Lirthei chesual zingah Two Wheeler a tam ber thu sawiin, Traffic dan bawhchhia ah pawh Two Wheeler an tam ber thu a sawi a ni.

Aizawl Traffic Police te chhinchhiah danin nikum (2025) chhung khan Mizoram pumah lirthei a chetsualna tum 111 a thleng nia chhinchhiah a ni a, heng zingah hian mihring thihna thlen khawp chetsualna tum 85 thlengin lirthei chesual-ah mi 95 an thi tawh a, hliam na tak tuar mi 31 awmin hliam tenau tuar mi 38 an awm bawk a. Nikum chhung khan Mizoram-ah lirthei chetsualna thleng avanga thi leh hliam mi 164 an awm a ni.