Govt. Dawrpui Vengthar Middle School-a ‘Sports School’ siam dan tur en ho

School Education Minister Dr. Vanlalthlana hovin Sport Minister leh Bialtu MLA, Lalnghinglova Hmar te chuan Aizawl-a Govt. Dawrpui Vengthar Middle School chu tun aia tangkai zawk leh tha zawka hman a nih theih nana ‘Sport School’ a siam theih dan tur niminpiah khan a hmunah an enfiah.

Sport Minister Lalnghinglova Hmar hian kum kaltaah khan Dawrpui Vengthar YMA leh Local Council hruaitute nen inhmuhkhawmin Govt. Dawrpui Middle School tihhmasawn dan tur an lo sawiho tawh thu a sawi a. Govt. Dawrpui Vengthar Middle School chu zirlai an neih tlem avangin a building area chu Sport nena kaikawpin ‘Sport School’ atan siam nise tiin ngaihtuahna an lo hmang tawh tih a sawi a. Sport discipline thlan bikah inkhel thiam ten an zirlai bahlah lova, infiamnaa hma an sawn theih nan Sport School chu siam tum a nih thu leh Zirtirtu awmsa leh Sport discipline a zirtirtu thiam ber ber ten zirlaite an zirtir tur thu a sawi a. Sport School chu National Education Policy (NEP) 2020 thiltum nena kalkawp tlat a nih thu Minister chuan a sawi bawk.

He hunah hian School Education Minister Dr. Vanlalthlana pawhin Dawrpui Vengthar chuan zirna ngai pawimawhtu, Bialtu MLA tha tak an nei chu an vanneih thu a sawi a. Khawtlang hruaituten zirna lam an ngaihsak a, an inrawlh tam chuan School leh zirna a tha thin tih sawiin, Zirna tihhmasawn nan zirtirtu insiamrem leh semrual mek zel a nih thu a sawi a. Sawrkar Zirna In tihchangtlun chu mi harsa zawkte tanpuina a ni tel tih pawh sawiin, Zirtirtute leh khawtlang hruaitute thawhhopuiah a sawm a ni.

Govt. Dawrpui Vengthar Middle School-ah hian Academic Session kal mekah zirlai 23 an awm a, Pawl 5-ah zirlai pathum, pawl-6 leh pawl-7 ah zirlai pasarih ve ve leh pawl 8-ah zirlai paruk an awm a ni.