All India Media Conference ah Mizoram Journalist te tel

Election Commission of India (ECI) buatsaihin nimin khan All India Media Conference -2026, India International Institute of Democracy & Election Management (IIIDEM) chu New Delhi-ah neih a ni a, Mizoram atangin Jt. Chief Electoral Officer Ethel Rothangpuii hoin journalist thenkhat te an tel a ni.
He Media Conference-ah hian India rama State leh UT zawng zawng atangin media mi te leh State Media Nodal Officer te an tel a. Democracy a journalist te mawhphurhna pawimawh zia thlur bingin, inthlan kaihhnawiha mipui hriat tur thu dik zau zawka an puanzar a, thudik lo (misinformation) thehdarh dolet kawngah chak lehzuala an thawhho theihna tur atana buatsaih a ni a, ‘Connecting Stakeholders, Strengthening Democracy: The Role of Media in Elections’ tih chu thupui atan hman a ni.

Mipui ten Electoral Roll chungchang te, vote thlak dan leh chhiar dan te chiang lehzuala an hriat theih nan te; inthlanna kaihhnawiha India Danpui leh inkaihhruaina chungchang te; Election Management a mawhphurtute, mi thiam bikte leh Election Commission hotute nena inkungkaihna tha zawk an neih theih nan te State leh UT hrang hrang Media te hi kohkhawm niin kum tin hetiang hun hi buatsaih thin tum a ni a. ECI hnuaia Director General (Media), Director General (Information Technology) te bakah dan lama mi thiam DDG (Law) ten hun an hmang a. An thupui zirho zingah ECINET Platform leh Election a IT pawi-mawhna te, Election a Media pawimawhna te, Dan kaihhhnawih leh Court Judgment chungchang te a tel a ni.

Conference-a tel te hi Group hrang hranga inthenin sawrkar thuneituten Electoral Roll an buatsaih dan entirna (demonstration) te, vote thlak dan chhawng hrang hrang te, vote chhiar dan te a taka enin sawihona hun an hmang bawk a ni.