Chief Minister Lalduhoma’n 'Kalphung thar ka hmu lo' ti te chuan an hre duh lo lui niin a sawi
Nimin khan East Lungdar-a Thangburha Hall-ah Hrangturzo Bial ZPM East Block Conference neih niin Chief Minister Lalduhoma chuan khuallian niin a hmanpui a. He hunah hian Chief Minister chuan, “Kan sawrkar chak chhan ber zinga mi chu kuthnathawktute dawmkan a ni,” tiin “Sawrkar kalphung (System) kan thlak danglam hi chu a tam lutuk a, darkar tam fe sawi daih a awm. 'Kalphung thar ka hmu lo' ti te hi chuan an hre duh lo lui a ni,” a ti a. “Tunah chuan kan sawrkar chuan rate hresa in thlai in ching dawn kan tih kha Vawiin-ah thleng dikin, thlai chi 5- Sawhthing, Aieng, Hmarcha, Hmunpiah leh Buhhum-ah kan hmu. Thlai dang pawh la tihbelh zel kan tum. A thlawna sawrkar kalta atanga sum sem ang ni lo thawhrimna atanga neih, sum kan hmangral mai mai phal lo, hei ringawt pawh hi kutthathawktute thlai thar kan lei phena thil hlu tak a ni,” a ti a. Kuthnathawktute tan Zau (cluster approached) zawngin thil thuhmun chingte awlsam zawk nan hmunkhat ah dahkhawm an tum chho zel dawn tih pawh a sawi bawk.
Hei bakah hian Chief Minister Lalduhoma chuan Hrangturzo Bial chhungah KM 65-a thui Artahkawn atanga Zawlsei cheng vbc. 250 vel siam ngai chu PM Divne atangin an beisei mek thu a sawi a, “Kan sawrkarin Mizoram-ah a vang zawng (chhak leh thlang) zawnga kawng sial a ngaih pawimawh zingah dah a ni,” a ti bawk.
He hunah hian Bialtu MLA, Lalmuanpuia Punte pawhin Bial chhung hmasawnna hrang hrang a sawi bakah kalphung thar sawrkarah chuan sawrkar tan tirh atangin thil danglam tak a thlen thu sawiin, PSU thenkhat tla bal tak tak sawrkar tana phurrit ni thinte pawhin hlep nei khawpin hna an thawk chho tan niin a sawi a. Tuichangral khuaah a hmasa ber turin E. Lungdar Field-ah Artificial Grass phah a nih tur thu leh Artahkawn atanga Biate inkar kawng cheng vbc. 15-in tun Thal-ah siamthat tur a nih thu a sawi a. “Kan Chief Minister-in a sawi fo angin, lui pawh a hnar a fim chuan lui mawng thlengin a luang fim thin a. CM leh Minister 'corruption' laka fihlim kaihruaina ah chuan Official-te pawhin sawrkar hluia an tih thin tam tak anmahni thuin an titawp a ni,” a ti a. “Sawrkar tharah chuan Unit leh Block hruaituten hamthatna inchuhbuai lova term chanve kan kal anga kan kal zel chuan inthlan lehah pawh Hrangturzo Bial-in ZPM MLA a nei leh ngei ang,” a ti bawk.