STA in taxi Permit pek dan tur ruahmanna an siam

State Transport Authority (STA) chuan thla thar July ni 1, 2026 atanga hman tan tur ‘Mizo Taxi App’ hnuaia inziaklutin mamawh a phuhru lo anih chuan Permit thar pek tum a nih thu an sawi.
State Transport Authority (STA) chuan niminpiah khan thuchhuah siamin July ni 1, 2026 atangin ‘Mizo Taxi App’ chu an hmang tan dawn tih an sawi a, 1st Phase hnuaiah permit pek phawt nise an tih thu sawiin, Two Wheeler-ah lirthei 300 leh Four Wheeler ah lirthei 200 pek nise an ti a, Auto Rickshaw chu Aizawl khawpui chhunga hmun hrang hrangah 10 theuh pek nise an ti a ni.

Aizawl khawpui tana awlsam zawka Online Booking System ‘Mizo Taxi App’ chu July ni 1, 2026 atanga hman tan tur a ni a, tuna Aizawl Taxi leh Auto Rickshaw tlan mek te tan MizoTaxi hnuaia inziahluh theih hun chu June ni 30-ah a tawp dawn a ni.

State Transport Authority thuchhuah tarlan danin tun dinhmunah Mizo Taxi App hnuaia inziaklut lirthei 306 an awm tawh a, heng lirthei zingah hian Two Wheeler inziaklut tam berin lirthei 159 an inziaklut tawh a, Four Wheeler lirthei inziaklut 143 awmin Auto Rickshaw inziaklut pali a awm bawk a ni. STA chuan Mizo Taxi App hnuaiah man chawia mipui phur lirthei te inziaklut zel turin a sawm a, inziaklut duh te tana remchan zawk nan sawrkar chawlh ah pawh inziah-luh zel theih a nih thu an sawi a ni.

Tarlan tawh angin Taxi a eizawng pawl pathum Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners Association (ADAROA) te chuan State Transport Authority (STA) in rate hman tir a tum chu kum 2024-a siam daih tawh a nih thu sawiin, hman chi ah an ngai lo tih an lo sawi tawh a ni.