Kolkata Mizoram House enfiah

KMTTPP leh Railway Lines in Mizoram a nghawng a neih theih dan tur zirchiang tura Kolkata a a cham mek Lunglei West Bialtu MLA T. Lalhlimpuia chuan nimin khan Kolkata Salt Lake-a Mizoram House tlawhin Building siamtha tura hmalakna kal mek a enfiah a. GAD changtu Chief Minister Lalduhoma leh PWD Minister te hmalaknain Mizoram House Building chhe zual lai siamthatna tur fund cheng vbc. thum chung hret ruahman mek a nih thu sawiin, hun reilote ah hna thawh tan a nih tur thu a sawi a. He sum hian Building chhe lai zawng zawng siamthatna a daih dawn loh avangin PWD Engineer te nen uluk lehzual a enho a hmalak dan tur sawiho a tul tur thu leh Fund awm dan a zira a tahtawla hnathawh a tul tur thu a sawi bawk. Lunglei West Bialtu MLA hian Mizoram House Building chhung thawmthat ngai hrang hrang leh Electric lakna tha lo bakah a hungna siamthat ngai te a en a, Mizoram House JRC, Zoremthara Ralte leh a thawhpuite bakah  Contractor Jatan Builders ten an tawiawm a ni.