Remna leh muanna hlu tak kan dawn hi duat taka enkawlin tichak deuh deuh ang u - Larsap
Remna Ni puala mipuite hnena thuchah a siamah Mizoram Larsap General (Dr) Vijay Kumar Singh chuan Remna Ni chu Mizoram chanchina hun chhinchhiah tlak leh danglamna thlentu pawimawh tak a nih thu sawiin, “Mizoram zalen, hmasawn leh thang chak siam turin beiseina thar min pe a ni,” a ti a. “Kum 40 kaltaa inremna thuthlung ziah chuan kan ramah remna tluantling a rawn thlen a, hei hian hun engemawchen buaina in Mizoram a chiah chu titawpin, inpumkhatna, inremna leh hmasawnna lam hawiin bung thar min kaipui ta a ni,” a ti. Mizoram tan a ni tih hriaa remna leh muanna a awm theih nana an finna, huaisenna leh inpekna nena th athawhtu zawng zawng te he ni a lo thlen hian zahna chibai bukin, “A bikin remna leh muanna a awm theih nan leh India ram State ralmuang ber kan nih theih nana nunna hlu tak hlantute kan hre reng a. An inhlanna leh Mizoram tha zawk siam tura an beiseinate chuan tun thlengin min hnehin phurna min pe a ni,” a ti bawk.
Remna chu buaina laka fihlimna mai a ni lo tih Larsap chuan sawiin, “Mitin leh rampum khawsak phung thuk taka nghawng thei thil a ni a. Remna leh muanna tel lovin eng hmasawnna mah hi a kal hlei thei lo a ni. Remna leh muanna chuan mihring dikna leh mipui rorelna chawisangin inrintawnna, dawhtheihna leh inunauna tha a siam,” a ti a. “He mellung pawimawh tak kan lawm mek lai hian remna leh muanna hlu tak kan dawn hi duat taka enkawlin tichak deuh deuh ang u,” a ti bawk.
Remna Ni pual hian inremna thuthlung ziahin thil min rochunte hlenchhuah kawngah thahnemngai taka thawk turin intiam theuh tura mipuite chu chah bawkin, “India ram hmasawn siam kawnga thawh hlawk tak Mizoram hausa leh hmuingil, inrem leh hmasawn siam turin theihtawp chhuah tlang theuh ang u khai,” a ti bawk.