Khualzin tlawh tam hmun ah Plastic khuahkhirh tum
Serchhip District a khualzin te tlawh zin hmun thenkhat a hman khat daih plastic hman khapna chungchang hi nimin khan District Bawrhsap Paul L. Khuma hovin Serchhip DC Meeting Hall-ah sawiho niin Serchhip District chhunga khualzinte tlawhzin (Tourist Site) hmun pali – Vety Farm Dilpui, Vantawng Khawhthla, Tuirihiau leh Golf Course & Resort hmun te chu tawih thei lo hman khat daih (Single-use) plastic hman khapna hmuna puan tur niin hmalak zui dan tura ruahmanna ‘Action Plan’ te sawiho a ni a. Bawrhsap Paul L. Khuma chuan bawlhlawh sawngbawl dan chu Sawrkarin a ngaih pawimawh thu sawiin, felfai leh hrisel taka heng hmunhma te hi vawn a nih theihna turin mipuite, khawtlang hruaitute leh sawrkar tanrual a pawimawh takzet thu a sawi a, Serchhip District mipuite chu faina kawnga theihtawp chhuahpui ah a sawm bawk a ni.
He thutkhawm ah hian Serchhip DC Office-a SDC Vanthangpuia chuan Serchhip DC Office-in ruahmanna ‘Action plan’ an siamte sawizau in sawihona neih zui a ni a; heng hmun pali - Vety Farm Dilpui, Vantawng Khawhthla, Tuirihiau leh Golf Course & Resort te chu Single-Use Plastics Free Zone-a puan a nih tur thu te, dan kenkawh dan turte leh dan bawhchhetute hremna tur chungchangte, mipuite’n an hriat tur tarlanna (hoarding) siam dan tur te leh July thla chhunga hmalakna tur hrang hrangte sawiho a ni a, chak taka bawhzui nghal tura rel a ni.
Nimin-a thutkhawm ah hian Addl. DC Dorothy Muansangi bakah Line Department – DUDO, BDO (Serchhip), SDO (Civil) Thenzawl, DIPRO, Police, Tourism, AH&Vety Department hotute leh Thenzawl South leh Buangpui VC bakah YMA hruaitute an tel a ni.