Governor's Unit Citation hlan
Lok Bhavan Durbar Hall-a hemi puala hun hman ah Larsap chuan Mizoram-a an awm chhunga an hnathawh entawn tlak tak avanga Governor's Unit Citation chawimawina dawngtu 20th Battalion Assam Rifles-te a lawmpui thu sawiin, Indo-Myanmar ramri buai em em laia ramri venhim hnathawh kawnga Battalion hmalakna te chu chhuanawm a tih thu leh Enforcement Agency dang leh Intelligence Unit lamte nen tha taka thawkho in, ramri kaltlanga ruihhlo tawlh leh dan lova sumdawnna hrang hrang ven kawnga an hnathawh te fakawm a tih thu a sawi bawk.
Larsap chuan Assam Rifles ten India hmarchhak venghimtu leh tlang mite thian nihna chawinunga khawtual mite nen lungrual taka an thawkho thin leh mipui vangtlang rawngbawlna hrang hrang tha taka an kalpui thin chu fakawm a tih thu sawiin, hei hian sipai leh mipui inkarah inpawhna tha zawk siamin Asaam Rifles thuvawn, ‘Seva, Suraksha and Bandhutva’ (Rawngbawlna, Venhimna leh Inunauna) chu a takin a rawn pholang tih a sawi a. Mizoram tana Battalion hnathawh leh thil hnutchhiah te hriat reng a nih tawh dawn thu sawiin, a hnu zela awm ten tha taka an chhunzawm zel a beisei thu a sawi a. An awmna apiangah Assam Rifles tihmingthaa chawilartu nih tum zel turin duhsakna a hlan a ni.
20th Battalion Assam Rifles-te hi 23 Sector HQ Assam Rifles, Aizawl hnuaiah November ni 12, 2023 atanga March ni 19, 2026 chhung khan Lunglawn, Lunglei-ah an awm a. Nimin-a Governor's Unit Citation hlanna hunah hian Brig. Puspendar Sorayan, DIG, 23 Sector Assam Rifles; Krashnendra Singh, CE, Pushpak; Col. Jaswinder Singh, SM, Commandant, 20th Battalion leh Official dangte an tel a ni.