Chief Minister Lalduhoma chuan Vawiin, June 30, 2026-a Remna ni-ah Mizoram mipuite, khawvel ram hrang hranga cheng Zofa zawng zawngte chibai bukin, kan ram leh hnam tana nunna chante zawng zawng zahna chibai a buk a. “Rambuai in kum 20 zet min chim chhung khan ram hmasawnna hna a kal thei lova, kum 1986-a remna leh muanna a lo awm atang khan mumal takin kan ram hian hmasawnna hna a kalpui ve thei ta chauh a. Chu chuan remna leh muanna hlutzia min hrilh a. Kan ramin hma a sawn zel theih nan remna leh muanna kan vawn nun a pawimawhzia pawh min hrilh a ni,” a ti. Chief Minister chuan Remna leh muanna boruak hnuaia kan awm hnuah Mizoram hian hma kan sawn chak hle tih pawh sawiin, “Tunah chuan India rama ziak leh chhiar thiam vekna State kan lo ni ta a. Sustainable Development Goals tihhlawhtlinna kawngah hmarchhak Bial-a titha ber zinga mi kan ni a. Eirukna lama State fihlim ber zinga mi kan ni,” a ti bawk.
