Serchhip District-a Bawlhhlawh paih dan ruahmanna thar kalpui dan tur sawihona nei
Felfai leh mumal zawka bawlhhlawh chi hrang hrangte sawngbawl dan tur 'Village Action Plan' sawiho-a Serchhip District-a 'Special Cell for Solid Waste Management' thutkhawm Serchhip DC Meeting Hall-a neih hi Bawrhsap Paul L. Khuma chuan kaihruaiin India ram pumah bawlhhlawh sawngbawl dan kawngah dan zawm tha lo an tam avangin Supreme Court chuan May ni 5, 2026 khan Dan zawm tha tura thuchhuah a siam thu leh he thuchhuah leh Solid Waste Management Rules, 2026 tlawhchhanin Serchhip District chhunga khawpui (Town) leh thingtlang (Village) khaw tinahte chak taka hmalak dan tur ruahmanna hrang hrang siam a nih thu a sawi a; Khawtlang hruaitute leh mipuite tawiawmna te, khawtlang tanrualna te a pawimawh thu sawiin, faina leh hriselna kawngah mi dangte tana entawntlak nih tum theuh turin mi tinte a sawm a ni.
He thutkhawm ah hian Serchhip Deputy Commissioner Office-a Superintendent F. Lallawmkima chuan bawlhhlawh sawngbawl dan tur chungchanga ruahmanna 'Village Action Plan' tlangpui sawi zauna a neih hnuin sawihona neih zui a ni a. Hetah hian chhungkaw tinte mawhphurhna tur te, Village Level Solid Waste Management Committee (VSWMC) mawhphurhna tur te, Village Council leh Block Development Officer-te leh Department hrang hrang mawhphurhnate sawiho a ni a. He ruahmanna hnuaiah hian bawlhhlawhte chu chi li (4) - Wet Waste (tawih thei); Dry Waste (tawih thei lo); Sanitary Waste (zun leh ek thiarna thil hrang hrang etc.) leh Special Care Waste (rawng bur, damdawi chhia, e-waste etc.)-ah te thliar hran vek tur niin, a paihna tura siamah te chauh paih tur a ni dawn a. Hei bakah hian khaw chhunga bawlhhlawh hal khap tlat a ni dawn a, dan zawm lo leh bawhchhetute chu Solid Waste Management Rules Section 21 hmangin hremna khauh tak pek theih an ni dawn a ni.
Solid Waste Management Rules, 2026 hi kumin April 1 khan hman tan niin Solid Waste Management Rules, 2016 chu a thlak a, Solid Waste Management Rules, 2026 ang chuan mi 100 aia tam punkhawm anih dawn chuan a hma ni thum la awmin ULP (Aizawl-ah chuan AMC) an hriattir a ngai dawn a. Bawlhhlawh siam chhuak tam (bulk waste generator) te mawh-phurhna siamsak an niin hei hian building zau zawng 20,000 sq.m chin chunglam emaw, ni khata tui litre sing li hmang chin emaw, ni khata bawlhhlawh kg 100 siam chhuak chinte a huam dawn a. Hetiang hian Aizawl-ah chuan Assam Rifles, Mizoram University leh a hlawma awmte a huam dawn a ni. Bulk waste generator te hi dan thar ang chuan ULB ah inziahluh (register) a ngai a, bawlhhlawh tawih thei anmahni in an thehthang a ngai dawn a, an theih loh chuan ngaihhnathiam dilna (exemption certificate) an dil a ngai dawn a. Hei bakah kumtin June ni 30-ah Annual return an thehluh a ngai bawk ang.
Dan tharah chuan tunhma atanga bawlh-hlawh lo chekkhawl (legacy waste) chu October ni 31,2026 ah chuan zirchian vek tawh tur a niin heng bawlhhlawh chinfel dan tur hi ULB in ruahmanna (action plan) a siam ang a, an chinfel dan chu Pollution Control Board in an endik thin ang.
Solid Waste Management Rules 2026 hi Aizawl khawpuiah chuan Aizawl Municipal Corporation, Lunglei-ah Lunglei Municipal Council, Urban Town-ah UD&PA Department leh a bak khuaah Rural Development Department in mawh an phur dawn a. Nimin-a Bawrhsap hova thutkhawm ah hian sawrkar Department hrang hrang aiawh te bakah khawtlang hruaitu Village Council aiawhte an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!