Lok Sabha MP hovin Saitual-ah DISHA thutkhawm nei

Nimin khan Saitual-ah District Development Coordination & Monitoring Committee (DISHA) chu an Chairman leh Lok Sabha MP Richard Vanlalhmangaiha hova thukhawmin sawrkar laipui ruahmanna hnuaia hmalakna chi hrang hrang kalpui dan an thlirho a. He hunah hian Lok Sabha MP chuan mipuite hmasawn nan Sawrkar laipui scheme pawimawh tak tak duan thin a nih thu leh heng Scheme kalpui a nih dan te leh line department thawh chin te inhriat-pawh tawn nan DISHA Meeting hi quarter tin neih thin a ni tih a sawi a. Sawrkar laipui scheme (Centrally Sponspored Scheme) te chu mipuite chawikan nan leh ram hmasawn nan a pawimawh hle a ni tih sawiin, heng Scheme kalpuitu Department hotute chu thahnemngai taka thawk zel turin a sawm nghal a ni. DISHA hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siam a, an Scheme a hlawhtlin theihna tura thawhho dan kawng zawng tura din a ni.