Hmunpui khua in an khua-a sawrkar hmalakna avanga lawmthu sawina hun an hmang

Mamit District chhunga Hmunpui khua chuan an khuaa sawrkar hmalakna hrang hranga lawmthu sawina hun nimin khan hmangin he hun hi Chief Minister Lalduhoma chuan a hmanpui a. Hmunpui khua chu khaw pawimawh tak a nih thu sawiin, “Sawrkar pawhin a theihna apiangah a ngaisak zel dawn che u,” a ti bawk.

Hmunpui khua hian an khaw kawngpui black top thar te, an khaw Health Sub-Centre building leh Quarters thar te, Chief Minister Rubber Mission thawh hnihna atanga an khuain Rubber Hectare 25 chinna an hmuhte lawmna hun hi an khaw Community Hall-ah hmangin Chief Minister Lalduhoma chuan Hmunpui khawtlangin Blacktop kawngpui thar, BC ngata siam an neih avanga an lawmna thusawi te a lo hmuh thu sawiin, “A hmutu apiangten an lawmpui che u niin ka hria. Kei pawhin ka lawmpui che u a ni,” a ti a. “In khaw kawng hi PMGSY hmanga Cell filled Concrete-a siam a lo ni tawh a, a lo chhiat tak avangin kan sawrkar hian SASCI 2025-26 Part-I atangin cheng vbc. thum (3 Crore) sengin kan siam tha ta a ni,” tiin an khaw kawng chu duat taka an enkawl zui loh chuan a tlo lo ang tih a hlauhawm nia a hriat thu a sawi bawk.

Chief Minister chuan Chief Minister a nih tirh khan Rubber Board of India Chairman Dr. Shawar Dhanania chuan rawn hmuin Tripura State-in Chief Minister Rubber Mission tha taka an kalpui anga Mizoram-a kalpui ve tha a tih thu a rawn sawi thu sawiin, “Rubber chin theihna ram hi kan nei tha a, Rubber hi kum 40 thlenga hnai theih a, a hnai tlak tawh loh hnuah Thingzai-a hman zui leh theih a ni a. Ramngaw a siam a, tuihna a tipung a, a hralhna a tha bawk si a. Tripura lamah a zirchiang turin Official Team ka tir thla a. An report-te kan han ngaithla a, kan kalpui ve ta a ni,” tiin CM Rubber Mission hmang hian ram Hectare 11500-a zauah Rubber kung nuai 51 chuang phun thar an tum thu a sawi a. “Kan thawhpui (progress partner) te hi a tirah Hectare khat theuh han pe phawt ila, a tul anga zauh zel theih turin hma lo la se kan ti a. First Phase-ah khan Potential kan neih thatna Mamit leh Kolasib District-ah Hectare 1,000-a zau-ah bul kan tan a. Second Phase-ah hian District pariat ah Hectare 2,575-a zau-ah kan kalpui leh ta a. Hmunpui pawhin Hectare 25 in chang ta ni,” a ti bawk.

Hei bakah hian Hmunpui Sub-Centre chu sak that a tul hle tih an hriat thu Chief Minister chuan sawi bawkin, “NABARD RIDF 30 hnuaiah kan rawn thun a, tunah chuan a lo puitling ta a. Ka lawmpui hle che u a. Mipuiten tangkai takin in lo hmang dawn nia,” tiin a chah a. “Hmunpui hi zirna ngaisang khua, khaw taima leh Lengpui Airport khawl pawimawh DVOR bunna hmun a ni a. Khaw pawimawh tak in ni. Sawrkar pawhin a theihna apiangah a ngaisak zel dawn che u a, in khaw Power Supply lakna kalkawng pawh hi a tharin survey kan nei mek a ni,” a ti bawk.

Hmunpui khua in nimin-a Lawmthu sawina hun an buatsaih hi an khaw Village Council President (VCP)  H. Lalkaisara chuan kaihruaiin Bialtu MLA Er. H. Lalzirliana chuan Chief Minister-in Hmunpui a tlawhnaa tawiawm turin a sawm avangin a lawm hle tih a sawi a. “A (Chief Minister) kaihhruai sawrkar hnuaia hun reilote chhunga hmasawnna duhawm tak tak Hmunpui-in a hmuh avang pawhin lawmthu ka sawi a ni,” tiin Khawtlang hmasawn zelna tura hmalak ngai nia a ngaihte a tarlang bawk.

He hunah hian VC Vice President H. Lalduhsanga chuan khawtlang aiawha lawmthu sawiin, “Metal Road kan la neih ngai miah loh kan nei a, Health Sub-Centre leh Quarters thar kan nei a, chhungkaw 24 tan Rubber eizawnna min pe a. Khawtlang mipuite lawmna hi a sang em em a, thil danga kan indaidanna te dah thain khawtlang mipuiten he hun hi kan buatsaih a ni,” tiin he hunah hian Hmunpui khawtlang mipui thahnem tak an tel a ni.