World Hearing Day hman a ni

Nimin khan 'Ri Hriatna Ni' (World Hearing Day) chu a vawi 11-na atan Mizoram-ah hman niin he ni hi kum 2007 atang khan khawvel pumah hman thin a ni.

Directorate of Hospital & Medical Education Auditorium-a he hun hman hi NHM Mission Director, Dr. R. Lalchhuanawma chuan kaihruaiin Persons with Disabilities (PWD)-a Commissioner, Vanlaldiki chuan khuallian niin a hmanpui a, Civil Hospital, Aizawl-a MS (ENT), Dr. Rita Zoramthari chuan he ni thupui, ‘From communities to classrooms: hearing care for all children’ (Khawtlang atanga naupangte thlengin: ri hriatna tha nei tura naupangte enkawl) tih hmangin thu a sawi bawk a ni.

WHO-in a zirchianna ah Ri hriatna tha lo hi kan thil hriatna 5 (sensory organs) zinga piansualna-ah a tam ber a ni a. Tunah hian khawvel pumah mihring tluklehdingawn 1.5 (1.5 billion) vel hian ri hriatna chaklo an nei a, heng zinga mak-taduai 430-te chu an beng a ngawng a, tun ang zela kan kal chho anih chuan kum 2050-ah chuan mihring 10-ah 1 zel hi an beng a ngawng dawna chhut a ni. Hetiang anih avang hian kan beng hi kan enkawl uluka, bengngawnna thlentu hrang hrang lakah kan inven fimkhur a ngai tih tarlan a ni bawk.

Hemi kawnga hma la tur hian National Programme for Prevention and Control of Deafness (NPPCD) chu kum 2014 August thla atang khan Mizoram-ah pawh National Health Mission hnuaiah din a ni a. Kumin FY 2025-2026 (April 2025 – January 2026) thlenga chhin-chhiah danin Mizoram chhungah Beng lama insawiselna nei mi 31,735 lai en niin Beng natna emaw Beng ri hriatna thalo nei mi 4,750 hmuh-chhuah tawh an ni a, mi 222 chu beng thalo vanga zai an ni tawh bawk. Hei bakah hian mi 1,541 chu Bengdar dawng tur leh Speech Therapy tul ang te ti tura refer an ni bawk.