Hulhliap SSC-a Training chhuak te Certificate hlan

Hulhliap Short Stay Centre chhuakte tana a thlawna Skill Training - Aluminium Fabrication leh Assistant Electrician zirchhuak te hnena Certificate semna hun chu nimin khan neih a ni.

Hulhliap Short Stay Centre chhuakte tana a thlawna Aluminium Fabrication leh Assistant Electrician zirna buatsaih kharna leh Certificate semna hun hi MFM Skill Training Centre, Dawrpui Vengthar-ah neih niin tun tumah hian Hulhliap SSC chhuak mi 14-ten Assistant Electrician zirchhuakin mi 21 ten Aluminium Fabrication training an zo a ni.

Nimin-a hun hman ah hian MFM Executive Director leh Task Group on Aftercare, Skill Training & Handholding, Hulhliap-SSC Member Lalramchuanzela chuan report pein tun tumah hian mi 35 hnenah Certificate semchhuah a ni tih a tarlang a. Assistant Electrician hi January ni 28-a tan niin, Aluminium Fabrication hi February ni 17-a tan a ni tih a sawi a. He hunah hian training chhuakte chu taimakna leh teirei peihna an neih phawt chuan Mission Foundation Movement-in Japan rama a thawhpuite chuan Japan ramah Motor khalha thla khata nuai chuang hlawh thei tur thalai za chuang an mamawh thu leh thawn-chho tura ngenna an rawn siam te tihlawhtling thei tura mahni invawng a, thahnemngai tak leh taima taka thawk zel turin a sawm a ni.

Hulhliap Short Stay Centre chhuakte tan hian eizawnna an neih zui theihna turin Skill Training hi kawng hrang hrangin buatsaih thin a ni a, he huna tarlan a nih danin tun thleng hian Hulhliap SSC chhuak mi 118 hnenah Training Certificate an semchhuak tawh a ni.