Khualzin hipna hmunhma cheithat tum a ni

Tourism Minister Lalnghinglova Hmar chuan Mizoram hmun hrang hranga khualzin hipna hmun te chu cheitha a, tichangtlun turin ruahmanna siam a nih thu a sawi.

Tourism Minister Lalnghinglova Hmar hian Inrinni khan Sakawrhmuituai tlang, Durtlang North, Sakeikhawthlir (Durtlang), Muthi leh Laipuitlang-a Tourism hmun cheithat tura ruahmante tlawhin hmalak dan tur khawtlang hruaitute a sawipui a. Sawrkarin a cheithat dan turah ruahman sa deuh nei mah se, a hrechiangtu khawtlang hruaitute rawtna leh duhdante ngaithla a, a tha thei ang ber nei tura hmalak tum a nih thu a sawi. Tourism Minister chuan hmasawnna ruhrel sak engemaw zat ah a enkawl leh hman dan turah ruahmanna tha a awm loh avanga tawl chhia a awm thin avangin tuna project turah chuan a enkawl chhunzawm kawngah khawtlang nen tha taka thawhho chu sawrkar in a duh tih a sawi a ni.

Mizoram-a Tourist Site cheithatna tur hian SASCI Part-II, 2025-2026 hnuaia ‘Development of Tourist facilities & attractions to Global Scale in the State of Mizoram’ atangin cheng vbc. 250 hmuh tawh a ni a. Hemi hnuaiah hian Tourist Site hrang hranga hmasawnna ruhrel siam bakah Tourist Lodge pawimawh bik cheithat te,  Wildlife Sanctuary behchhana Wildlife Tourism kalpui te, Water Sports Adventure hmun tur siam te, Paragliding thlawhna tur siamte a tel a ni.