Human Papilloma Virus (HPV) vaccine tlangzarh a ni

Chhul Hmawr Cancer thlentu Human Papilloma Virus (HPV) vaccine chu hmeichhe tleirawl kum 14-na hmang mekte tan sawrkar damdawi In hrang hranga a thlawna lak theih turin India ram pum huapin tlangzarh a ni ta.

Human Papilloma Virus (HPV) vaccine hi Rajasthan-a Ajmer-ah Prime Minister chuan tlangzarhin Mizoram-ah pawh he Vaccine tlangzarhna hun hi Civil Hospital Auditorium-ah Health Minister Lalrinpuii hovin hman a ni a, Health Minister chuan Prime Minister Narendra Modi-a’n hmeichhiate hriselna kawnga hmalakna tha tak a siam chu fakawm a tih sawiin, Mizoram chu India State zinga mihring awm zat za zela chhutin Cancer vei awm tamna ber a ni chu pawi a tih thu a sawi a, Mizo Cancer veiten an pan nasat ber pawl Tata Memorial Hospital, Mumbai-a an Director pawhin Mizo zinga Cancer vei an tam lutuk a vei thu leh zuk leh hmuam (tobacco products) kan tih nasat avang leh kan nunphung leh kan ei leh in a hrisel tawk loh vang a ni tih a hrilh thu a sawi a. Mithiamten an zirchianna-a an hmuhchhuah danin Sarep, Vawk thau leh Tel tha lo kan ei tam avang leh zuk leh hmuam kan tih nasat avanga Cancer vei kan tam thu a tarlang bawk a. HPV laka kan inven theihna tur vaccine a thlawna lak theih tura tlangzarh a ni chu lawmawm a tih thu a sawi a. Hmeichhe tleirawl kum 14-na hmang mekte chu he vaccine hi la vek turin a chah bawk.

Prime Minister-in Ajmer atanga India ram pum huapa HPV vaccine a tlangzarhna hi online-a thlirho a ni a. Chumi hnuah State Program tan a ni a. Dr. Zoramruati Ralte, Jt Director, EPI hnen atangin HPV vaccine chungchang ngaihthlak niin Chief Secretary Khilli Ram Meena pawhin he hunah hian thu a sawi bawk a ni.

Chhul Hmawr Cancer hi hmeichhe natna bik a ni a, Chhul Hmawr Cancer za zela 99.7% hi Human Papilloma Virus-in (HPV) a thlen a ni a. Kum 2024 khan India ramah Chhul Hmawr Cancer vei thar mi 78,499 an awm a, thi 42,392 an awm bawk. HPV chi hrang zinga 17-te hi Cancer thlentu (high risk) bik ni a hriat a ni a. Heng chi 17 zingah hian HPV 16 hi Chhul Hmawr Cancer thlentu hlauhawm ber zing ami niin, khawvel puma Chhul Hmawr Cancer zinga 77% hi HPV 16 leh HPV 18 inkawp in a thlen a ni a, India ramah chuan Chhul Hmawr Cancer zinga 88% hi he virus hian a thlen a ni. HPV natna hi kawppuite hnenah kaichhawn a awlsam hle a, mipat hmeichhiatna, mipat mipat-na leh oral sex atangin a inkaichhawn theih vek a ni.

Tunah hian khawvel pumah ram 160-ah HPV vaccine hi hman tawh a ni a. South East Asia Region (SEAR) a ram 10 zinga ram 8-ah HPV Vaccine hi hman mek niin, India ramah chuan HPV Vaccine hi Private Damdawi In-ah kum 2008 atangin hman tan a ni tawh bawk.