Department hmasa ber zinga mi an nih thu sawi

Excise & Narcotics Department changtu Minister Lalnghinglova Hmar chuan Excise & Narcotics Department chu Chief Minister thlawpna hnuaiah Department hmasawn berte zinga mi a nih thu a sawi.

Nimin khan Central Training Institute, Sesawng-ah 11th Batch, Excise & Narcotics, Basic Training zo te pualin 'Passing Out Parade' neih niin khuallian nia he hun a hmanpuina ah END Minister Lalnghinglova Hmar chuan Excise & Narcotics Department chu Chief Minister thlawpna hnuaiah Department hmasawn berte zinga mi a nih thu sawiin, Department-ah thawktu indaihlohna a nasat thin thu leh tun kum hnih kalta chhungin thawktu mi thar 28 Direct Recruitment-a lak fel an nih tawh thu te, mi 41 lak belh lehna tur pawh buaipui mek a nih thu leh post thar pawh 16 siam a nih thu a sawi a ni.

Heng bakah hian District thar pathum-ah Excise Station hawn thar a nih thu sawiin END Minister chuan, Inspector awpna hnuaia awm thin kha Lawngtlai nen Assistant Commissioner awpna hnuaia an awm tawh tur thu a sawi a. Sairang leh Bairabi-ah Excise Station thar hawn phalna pawh tunah an neih tawh thu a sawi a. Excise & Narcotics Deaprtment-in tunhnaiah lirthei thar 21 an dawn thu sawi bawkin, ruihhlo dona tura sawrkar inbuatsaihna vek a nih thu a sawi a. Training chhuak tharte pawh theihtawp chhuah tura chahin 'Indo kan ni a, kan do lamah kan tan a thiang lo,' tiin tumah ruihhlo-a inhnamhnawih lo turin a chah bawk.

11th Batch, Excise & Narcotics Basic Training hi September ni 1, 2025 atang khan neih tan niin Training chhuakte hi an vaiin mi 22 niin Sub-Inspector 12 leh Constable 10 an ni a. Nimin-a 'Passing Out Parade' hun hi Adviser to Chief Minister Lalmuanpuia Punte chuan Khual zahawm nia hmanpuiin END a thawktu lak tharte chu Party induhsakna tel lova fair taka lak an nih thu a sawi a. Mahni inrintawkna nena tha taka hna thawk tura fuihin, “Dan ang taka lak in nih angin dan ang taka thawk turin kan phutlet dawn cheu a ni,” a ti bawk.

Nimin-a 'Passing Out Parade' ah hian END-a Commissioner Z. Lalhmangaiha bakah Department-a mi pawimawh engemaw zat an tel a. CTI Commandant Lalrengpuia'n training chhuakte rinawmna thu tiamtirna hun hmangin training neih chhunga titha zual mi 5 te hnenah Minister-in lawmman a hlan a. Minister of State Excise & Narcotics Award for Best All Rounder chu Sub-Inspector K. Lalrohlua chuan a dawng a, Commandant General Award for Best Firer chu C/692 Lalsangzuala chuan dawngin Commissioner & Secretary Excise & Narcotics Award for Best Turn Out chu Sub-Inspector K. Lalrohlua’n a dawng a, Commissioner Excise & Narcotics Award for Best Discipline chu Sub-Inspector LP. Lalruatsaka leh Commandant, CTI Award for Best in Drill chu Sub-Inspector David Lalrinsanga ten an dawng bawk a ni.