A tlangpuia Budget sawihona zawhfel niin Vawiin-ah Minister demand sawiho tan a ni dawn

Mizoram Legislative Assembly Budget Session neih mekah Finance Department changtu Chief Minister Lalduhoma’n kum 2026-2027 atana Mizoram sawrkar sum hman dan tur ruahman a pharh chu a tlangpui-a sawihona neih zawh a ni ta a, Vawiin hian Minister hrang hrang ten an Department enkawlna atana sum an ruahman chu sawiho tan a ni ang.

Finance Department changtu Chief Minister Lalduhoma hian February 27, 2026 khan kum 2026-2027 sawrkar kum atana Mizoram sawrkar sum hman dan tur ruahmanna hi House-ah pharhin tunkar Thawhtanni leh Thawhlehni khan House-ah Member ten an sawiho a, Member te sawihona tlang kawmin Chief Minister chuan ZPM kaihhruai sawrkar chuan leiba tha chi chu a tam thei ang ber puk zel an tum rualin a tha lo chi chu tihtlem zel an tum thu a sawi a, ZPM kaihhruai sawrkar hnuah Open Market Borrowing (OMB) chu kumtin a la tlahniam ziah a, hei hi sawrkar tha tehna a ni lo thei lo tih a sawi a. Capital Infrastructure-a an tih that avanga sawrkar laipuiin Incentive tam tak an pek chu an ti tha nge tha lo tih tehna tur nia a hriat thu sawiin, an tih that leh that loh chu sawrkar laipui chuan a hrechiang ber a, lawmman hmu pha State zinga Mizoram sawrkar a tel chu lawmawm a tih thu a sawi a, kuminah Surplus Budget an pharh thei chu lawmawm a tih thu sawiin, a pumpuia an surplus-na tur chu cheng vbc. 392.99 a nih thu a sawi bawk.

Chief Minister Lalduhoma chuan tun Financial Year kal lai mekah COVID vanga siam SASCI atangin cheng vbc. 865 leh nuai 75 bakah, Incentive pali an dawng tawh tih sawiin, Incentive dawng thei tur chuan State tin te chu Fully Compliance State an nih a ngai tih a sawi a, sawrkar laipui biak thata dawn theih chi a ni lova, an tih that avanga dawng an ni tih sawiin, India ram State 9 chauhin an dawn theih laia Mizoram a tel bakah India ram pumpuiah 4-na a ni thei chu sawrkar hnathawk te avanga a nih avangin an chungah lawmthu a sawi bawk a ni.

Finance Department changtu Chief Minister Lalduhoma hian kum kal lai mek 2025-2026-a Budget sum indaihlohna leh siamrem ngai dil belhna, Supplementary Demand for Grants cheng vaibelchhe 3,724.25 chu a pharh a, a hman nghal theihna Appropriation Bill chu House chuan lungrual takin a pawm a ni.

Vawiin hian Session chhunzawm-ah Minister ten an Department enkawlna tura sum an ruahman chu sawiho tan a ni dawn a, Vawiin hian Minister Dr. Vanlalthlana leh C. Lalsawivunga te Department enkawl te sum ruahman chu sawihoa pass nghal tum a ni ang.