A tum khatna atan ‘Lunglei Ni’ hman a ni

Lunglei Municipal Council (LMC) huaihawtin nimin khan a tum khatna atan ‘Lunglei Ni’ chu hman a ni.

Kum 1889 March ni 4-a Colonel Tregear-a'n ‘Fort Lungleh’ a sak tan ni hriatreng nan leh Lunglei khawpuia cheng, thang leh thar zel te'n Lunglei khawpui hmangaihna thinlung an put thar zel theih nana Lunglei puala ni bik ‘Lunglei Ni’ hi Lunglei-a C. Thuamluaia Mual-ah hman a ni a, he hun hi LMC Chairman, Lalzuithanga chuan khuallian nia hmanpuiin Lunglei Ni chu hlim ni, lawm ni a nih rualin, hlim leh lawm taka hmanga tawp mai tur erawh chuan a uihawm tih a sawi a, Lunglei chu eng nge a nih a, Lunglei mipuite'n eng nge an tih theih sang ber tih hmuchhuak tura thawhrim bul tanna ni atan te, thuthluang a sawrkarin a tih sak tur thlir ringawt lova, mahni thawhchhuah hmang ngeia intodelh dan tur ngaihtuahna ni atan te hmang turin a chah a. Lunglei chu Municipal Council nei, khawpui lian a nih tawh avangin sawrkara innghat pumhlum ngawt lova, mahni thawh-rimna hmanga khawpui enkawl a, hmasawnpui tura mawhphurhna pek a nih thu sawiin, chu mawh-phurhna chu hlen tumin LMC chuan theihtawp a chhuah tih a sawi bawk a ni.

Nimin-a Lunglei Ni hman hi LMC Chief Executive Officer leh Organising Committee Chairman Lalhmansanga chuan kaihruaiin Lunglei Ni puala intihsiakna hrang hrang lawmman sem a ni a, Mizo Hnam Lam leh Zai te entirin, YMA Branch hrang hrang ten ‘Leitlangpui a chul dawn lo’ tih hla a huho in an rem a. Chawhnu lamah Rimawi hunpui hman chhunzawm a ni bawk.

Lunglei Ni hman pual hian tualchhung kutchhuak thuam leh thil leh ei tur chi hrang hrang zawrhna hawn niin naupang intihhlimna hmun buatsaih a ni bawk a. Lunglei Photographers' Association (LPA) buatsaih ‘Photo Gallery’ siam niin ‘Lunglei Ni Souvenir Magazine’ leh hriatrengna thil chi hrang hrang pholan a ni bawk.