SDM in Kolasib JAC te a ko

Kolasib Sub-Divisional Magistrate H. Lalramliana MCS chuan niminpiah khan Youth for Kolasib kaihhruaina hnuaia din Joint Action Committee (JAC) hruaitute chu a Pisa-ah ko in Kolasib khawchhung kawngpui siam mek leh hmalak dan tur chungchang a sawipui.

He inkawmna ah hian SDM, H. Lalramliana chuan JAC ten NHIDCL Office hual an tum nia Social Media atanga hriat a nih thu leh hetiang zawnga hmalakna hian boruak tha lo zawk a thlen palh a hlauhthawnawm thu a sawi a. NHIDCL leh kawng siamtu Contractor-te rikrap leh ti thlabar zawnga chetna chuan kawng siam hna a tih thuanawp theih zawk avangin an thil tum chu kaltlangpui lo turin a ngen a ni.

Hei bakah hian SDM chuan Contractor-ten an hna zofel tur hian July ni 7, 2026 thleng hun an neih thu tarlangin, hetihlai hian mi thenkhatin High Court lamah thlenin hma an lak avangin Contractor-te hian April ni 30, 2026-ah chuan an hna an zawh hman tur thu Affidavit hmangin an thehlut nia hriat a nih thu a sawi a. He thil hi High Court chuan a thlir reng thu leh hnathawkte hma-sawn dan pawh a en zui reng thu a sawi bawk a. Hetiang hi thil awmdan a nih avangin hnathawktute hna ti bahlah thei leh mipui nunphung pangngai ti buai thei boruak siam lo turin a ngen a ni.

Youth for Kolasib (JAC) hruaitute chuan NHIDCL leh a hnuaia Sub-Contractor ten an hna an thawk chak tawk lo leh mipuiten harsatna namen lo an tuar mek chu pawi an tih thu an sawi a. An lungawilohna lantir nan Feb. ni 16, 2026 hian Diakkawn YMA Hall atanga tanin College Veng-a NHIDCL Office pan-a hual an tum thu an sawi a ni.