Rajya Sabha MP in kawngpui chungchang House-ah sawi

Parliament Session neih mekah nimin khan Mizoram Rajya Sabha MP K.Vanlalvena chuan Zero Hour-ah Mizoram-a kawngpui pawimawh pathum siam thuai a tul thu a sawi.

Rajya Sabha MP hian Hnahthial atanga Myanmar ramri kawng pahnih, Hnahthial - Tarpho - Khawhri - Cherhlun - Thingsai - Bualpui H - Saisihchhuah kawngpui leh Hnahthial - Tuipui D - Darzo - S.Vanlaiphai - Sangau - Pangkhua - Saisihchhuah kawngpui te chu National Higway a puang ve ve turin sawrkar laipui a ngen a. Kum 2020-ah Myanmar sawrkar in Chin State khawpui Hakha atanga India leh Myanmar ramri Saisihchhuah thlenga Double Lane kawngpui an sial zawh tawh thu leh India sawrkar a Ministry of Commerce and Industry in Saisihchhuah-ah ramri-a insumdawn tawnna hmun tenau, Border Haat a puang tawh chungin kawngpui in a la pawh loh thu a sawi a. He kawngpui hi sial tlang a National Higway a puan an nih chuan Act Eat Policy tih hlawhtlinna atan te, ram venhimna atan te leh Mizorama tribal mipuite ei leh bara hma an sawnna atan te a tangkai tur thu a sawi a ni.

Hei bakah hian MP K.Vanlalvena chuan Sairang Rel Station hawn thar a nih atangin Aizawl leh Sairang inkar lirthei tlan zat a pun phah nasat thu sawi bawkin, tuna kawngpui awm mek National Higway No. 54 chu a zau tawk tawh loh thu leh a rang thei ang bera Four Lane kawngpuia siam a tul thu a sawi bawk a ni.