Zirtirtu Marksheet leh Certificate nei felfai lo chhuo zuiin a tul anga action lak a ni dawn

School Education Department Officer te chuan nimin khan an hmalakna thlirletna hun hmangin he hun hi Education Minister Dr. Vanlalthlana chuan a telpui a. Zirtirtute zingah Marksheet leh Certificate nei felfai lo an awm nia sawi chu chhuizui-a a tul anga action lak tur a nih thu sawilan a ni.

MINECO Secretariat Conference Hall-a School Education Department Officer ten Review Meeting vawi 7-na an neih ah hian School Education Minister Dr. Vanlalthlana chuan Review Meeting neih thin chu a tangkai thu leh thutlukna siam nan a that thu a sawi a, Officer-te chu kawng hrang hranga tan la turin a fuih bawk a ni. Education Minister chuan VSK leh Google Map pawimawhna sawiin, School a thawkten Vidya Samiksha Kendra (VSK)-a Attendance pek that a ngaih thu a sawi a, “Online-ah hnathawh hi hmuh theihin awm se, a duh apiangin an lo hmu thei dawn a, hnathawh tha lo a veng dawn a ni,” tiin VSK hmang hian an hnathawh theih chin chu nawr san theih a nih thu te, Google map update lo te chu an Grant dawn turte hmundanga pek leh mai thlenga hmalak a tul thu te a sawi a. LDC indaihlohna awm chu sawrkarin lak phalna a pek tawh chin bakah dil belh leh tum a nih thu leh Exam Centre School-te mamawhna pawh phuhruk theih beisei a nih thu te a sawi bawk.

He Meeting-ah hian Zirlaibu thar buatsaih a nih dan te leh Zirlaibu thar chu tuna hman lai nen a danglam dawn thu te tarlan a ni a, naupangte chu by-heart ringawt lova chik zawka zirtir dan turte, milem te, drama leh Field Trip a tam thu te, naupangte chu an tawnhriat hmangte leh zawhna zawt thiam tura chher tum a nih dan te sawilan a ni a. Class V leh VIII ten tun Promotion Exam atang hian zawhna inang an chhan dawn thu te leh School 770-ah he zawhna thar hi an Exam dawn thu leh result hi SCERT-ah lakkhawm a nih tur thu te sawi a ni a. Zirtirtute zingah Marksheet leh Certificate nei felfai lo an awm thu report niin, heng te hi chhui zuia a tul anga action lak tura sawi a ni bawk.

Heng bakah hian PM Poshan chu tha taka kalpui a nih thu te leh State Share hmuh that a nih avangin Cook te hlawh pawh pek theih a nih thu tarlan a ni a, Social Audit neih tawh a nih thu te tarlan a ni bawk.

He Review Meeting-ah hian Education Consultant Rev. Dr. K.Thanzauva, Mizoram Education Reforms Committee Working Chairman Prof Lalbiakdiki Hnamte te, School Education Department-a Officer te leh SCERT leh MBSE-a Officer te an tel a ni.