YMA in Sairang leh Vairengte inkar kawng enfiah

Central YMA hruaitute chuan Inrinni khan an President R. Lalngheta hovin Mizoram châk lakluhna Sairang leh Vairengte inkar kawngpui chu a hmunah an enfiah.

Sairang leh Vairengte inkar kawngpui enfiahna ah hian Central YMA President bakah Office Bearers mi 4 telin CEC Member 37 an thawkchhuak bawk a. PWD atangin SE, EE leh SDO te an tel bakah NHIDCL hotute leh an hnuaia Contractor te an tel a. Central YMA Team te hi Awithangpa Group YMA hruaitute leh Sub-Hqrs. YMA Kolasib hruaituten lo dawngsawngin Sub-Hqrs. YMA Office-ah leh Kolasib-a NHIDCL Office-ah kawng chungchang sawihoin Youth for Kolasib (YFK) te hmalak tawhna ngaihthlak a ni bawk a. Central YMA hruaitute hian kawng dinhmun enfiah hian Vairengte an thleng a, Vairengte Joint YMA Committee Room-ah sawihona nei lehin Vairengte - Sairang Four Lane laih tan mekah Contractor te pawh sawipuiin a nih dan tur anga hnathawk turin an chah a, an la en zui tur thu an sawi bawk.

He kawngpui an endikna ah hian NHIDCL leh Contractor te chuan Central YMA hruaitute hi hna an thawh mek leh an Work Plan te lo hrilhin, hmanraw lakluh leh thil danga harsatna an tawh te an lo hrilh a, Central YMA hruaitute chuan harsatna an neih te pawh inthlahrung lova an hnena thlen zel turin an hrilh a, kawng siam mekah tha taka an thawhpui tur thu an hrilh bawk. Central YMA hruaitute hian Sairang leh Kawnpui inkar kawng chhia siamtha tur Contractor te chu an hnathawh hun chhunga tha tak leh lungawithlak taka thawk zo hman ngei turin an chah a. An hnathawh dan hi an enzui zel tur thu leh Monitoring atan thil sawiho zung zung awlsam nan leh hnathawh dan tarlanna turin NHIDCL, Contractor te leh Central YMA hruaituten ruahmanna siam an a ni a. Central YMA hian kawng chungchang an hmuh dan hi Executive Meeting-ah an sawi zui leh dawn a, Mizoram sawrkara thlen tur leh NHIDCL leh Contractor te la sawipui zui turte an sawiho leh dawn a ni.

Central YMA President R. Lalngheta chuan Mizoram kawngpui thatna atan hian Sawrkar leh pawl hrang hrang ten hma an la a. Amaherawh chu chak lakna ber kawngpui chu a tha mawh hle tih sawiin, an hmalakna te en tlang a, tha taka hrilh an nih hnuah pawh a ngai reng a la ni a nih chuan ‘Mizorama hnathawk tur hian midang lo lut rawh se, anni chuan lo hawsan tawh rawh se’ tih hun te pawh a awm lovang tih a sawi theih loh tih a sawi a. Hemi hmalam hian Central YMA President chuan ram chhung inkal pawhna kawng chhe lutuk chu Truck neitu pawlte pawhin Court lamah an manganna an thehluh hnuah pawh hmasawnna hmuh tur a awm loh thu leh sawrkar Minister leh MLA rual pawhin an kalchilh pawhin awmzia a neih theih loh avangin hmalak tul nia an hriat thu a lo sawi tawh a ni.