Vote nei pakhat chauh awm tan ruahmanna siam dawn

Lai Autonomous District Council (LADC) Inthlanpui neih turah Vote nei mi pakhat chauh awmna Hmawngbuchhuah Polling Station-a Vote nei tan ruahmanna siam a ni dawn.

Thla thar December 3-a LADC inthlan lo awm turah hian Vote nei mi 56,857 an awm mek a, an zinga 29,013 chu hmeichhia niin mipa 27,844 an awm bawk a. Vote nei awm tamna ber Polling Station chu Pangkhua niin vote 1,189 awmin Vote tlemna ber chu Hmawngbuchhuah Polling Station niin Vote nei mi pakhat chauh a awm a ni. Thudawn danin Hmawngbuchhuah khua-ah hian Mizoram mi dik tak, India khua leh tui an awm meuh lova, Draft Electoral Roll-ah Vote nei pathum an awm laiin khua leh tui an nihna finfiah theih loh an nih hlawm avangin Vote nei pakhat chauh a awm ta a. He khua a awmte hi Myanmar-a Rakhine State a chengte leh Chin State chhim lam Paletwa leh a chhehvel khua ami, Myanmar rambuai avanga rawn tlanchhia deuh vek an ni. 

Heng mite hi a khaw thenawm a mite chuan 'Zakhai' hnam an ti a, Kawl tawng an hmang a, Buddhist Sakhaw bia vek an ni bawk a. Kum 2019 July thla khan Hmawngbuchhuah khua a raltlan awmte hi Myanmar-a an khua a ralmuan tawh avangin District thuneitute leh Assam Rifles tangrualin mi 300 dawn an lo chhuahtir tawh a ni. SEC chuan vote pakhat chauh nei awm chu a Vote thlakna a thup theih dawn loh avangin ruahmanna hranpa an siamsak dawn niin an sawi bawk a ni.

Mizoram State Election Commissioner Dr. H. Lalthlangliana chuan December ni 3-a LADC inthlan lo awm tur atan Polling Station 111 zingah venhim zual ngai Polling Station a awm loh thu a sawi a. Lirthei luh theih lohna, ke chauhva tlawhpawh theih Polling Station 4 bakah Lawng hmang chauha kalpawh theih Polling Station pakhat a awm thu a sawi bawk.