Kumin ah Aizawl khawpui in ruahtui a dawng tha

Kum kalta (2024) chhung khan Mizoram-ah ruahtui tla a tam hle a, Aizawl bika mm (millimetre) 2,295.9 zet a tla a. Hetihlai hian kumin (2025) January atanga October chhunga ruah tla zat chu mm 2,126.0 a tling tawh a ni.

Directorate of Science & Technology atanga thudawn danin nikum chhunga Aizawl-a ruahtui tla zat hi kum hmasa, kum 2023 chhunga zuahtui tla zat aiin a tam hle a. kum 2023-a ruahtui tla mm 1,972.8 aiin mm 323.1-in a tam zawk a. Nikum January-ah ruahtui mm 1.8 a tla a, February-ah mm 15.2, March-ah mm 33.8, April-ah mm 87.0, May-ah mm 519 leh June-ah mm 353.7, July-ah mm 35.5, August-ah mm 572.7, September-ah mm 231.6, October-ah mm 82.9, November-ah mm 20.2 leh December-ah mm 19.6 a tla a ni. Nikum-a ruahtui tlak tam ber ni chu May 28, 2024 niin mm 205.0 a tla a, data atanga a lan danin hetiang zata tam hi ni khat thil thu-ah ruahtui a tla zen zen lo a ni.

Chhinchhiahna atanga a lan danin kumin January thla ah ruah tla a awm lo a, February-ah mm 32.0 tlain March-ah mm 16.4, April-ah mm 61.8, May-ah 718.3, June-ah mm 378.0, July-ah mm 495.3, August-ah mm 456.2, September-ah mm 235.0 leh October-ah mm 133.6 ruahtui a tla a. Kumin-a ruahtui tla tawh zawng zawng chu mm 2,126.0 a tling tawh nia chhin-chhiah a ni bawk.

State Meteorological Centre, Directorate of Science & Technology-in a chhinchhiah tawh chinah Mizoram-ah kum 36 chhung (1986 atanga 2021) khan Fur laiin (June - September) kumtin ruah mm 1,289.9 sur ang a ni a. Kum 2017 kha Fur chhung bika ruahtui tlak tam ber kum niin June - September thla chhungin mm 1,836 a tla a. Kum 2020 kha Fur chhung bika ruahtui tlak tlem ber kum a ni a, mm 856.4 chauh ruahtui a tla a ni.