Dampa Bial-a by-election neih turah campaign hun tawpin naktuk-ah Vote thlak a ni ang

Naktuk November 11, 2025-a Dampa Bial-a Assembly by-election neih tur atana Campaign theih hun chu nimin, Pathianni tlai dar 4:00 khan a tawp ta a, Politicasl Party hrang hrangte chuan an Candidate te Vote turin mipuite an sawm a ni.

Election Commission of India chuan inthlanpui neih turah hian Vote thlak hun tawp atanga chhiarlet-a darkar 48 chhunga zawm tur dan hrang hrang a siam a, hemi ang hian naktuk, November 11, 2025-a by-election neihna tur Dampa Bial-a Campaign theih hun chu nimin, Pathianni tlai dar 4:00 khan a tawp ta a, Campaign theih hun a tawp hnu hian Dampa Constituency pawn atanga campaign tura kal, Dampa Constituency-a vote nei ve si lo ten Constituency an chhuahsan tawh tur a ni a, aurinna hman phal anih tawhlo bakah campaign phal a ni tawh lo a, Social Media leh a tlukpui dangah mipui rilru sukthlek tidanglam thei thil dahchhuah phal a ni lo bawk a, Dan zawmlo te chu kum hnih (2) thleng lung In tan emaw, pawisa chawi emaw, pawisa chawi leh lung In tang tura hrem theih an ni dawn a ni.

ZPM Party chuan Inrinni khan Aizawl-ah an President Lalliansawta hova thuthar thehdarhtute kawmin he inthlanna neih turah hian ZPM Candidate Vanlalsailova lo Vote theuh turin Dampa Bial mipuite chu an sawm a, “Mizoram leh Mizo mipuite tan thil tha tam tak kan ti tawh a, kan ti mek zel bawk a. Hetih rual hian mipui duhkhawp kan tlin lohna lai te pawh a awm tih kan hria a. Tun term hmang zo tur hian kum 3 hun kan la nei a. Mizoram leh Mizo mipuite tan ZPM hian theihtawp kan chhuah zel dawn a ni,” an ti.

MNF Party chuan Inrinni khan Aizawl-ah thuthar thehdarhtute kawmin he hunah hian an Party Treasurer Lalruatkima chuan Pathian leh mipuite zarah MNF Official Candidate leh an Party Sr. Vice President Dr. R. Lalthangliana chuan sang taka hnehna a chan ngei an beisei thu a sawi a, “Dampa Bial mipuite vote thlak vek turin kan sawmin kan ngen a. MNF Official Candidate Dr. R. Lalthangliana vote theuh turin Dampa bial mipui zawng zawngte thinlung takin kan ngen,” a ti a ni.

MPCC Treasurer Dr. Lalmalsawma Nghaka pawhin Inrinni khan thuthar thehdarhtute kawmin Dampa Bial-ah an la hriat ngailoh sum lengvak a nasa hle nia sawiin, Dampa Bial mipuite inveng him turin an sawm tih sawi a, mipuite dikna chanvo tundin a nih zel theih nan an Candidate John Rotluangliana vote theuh turin Dampa Bial mipuite a sawm a ni.

BJP huan Inrinni khan West Phaileng Dinthar Kawn-ah Vantlang Inkhawm an nei bawk a, he hunah hian BJP MLA K. Hrahmo chuan Dampa Bial mipuite chu kum thum (3) chhung atana BJP enchhin tura ngenin, “Central Sawrkar a kan Bial mamawh te sawi chhuak tur chuan BJP MLA kan neih ngei a pawimawh hle,” tiin an bial hmasawnna atana BJP Official Candidate Lalhmingthanga lo Vote theuh turin a sawm bawk a ni.