Serchhip-ah Children Empowerment Summit neih a ni

Tun thla ni 14-a Serchhip-a ‘Children's Day’ hman kal zelah nimin khan ‘Children Empowerment Summit’chu Serchhip-ah neih niin Bawrhsap Paul L. Khuma chuan khuallian niin a hmanpui a ni.
Serchhip Bawrhsap Pisapui Hall-a ‘Children Empowerment Summit’ ah hian thupui atan ‘Build a strong future’ tih hman niin Bawrhsap Paul L. Khuma chuan tun thla ni 14-a Naupangte ni hman a nih hnuah District Child Protection Unit (DCPU) leh Women & Child Development Department tangkawpin naupang ten hmakhaw engtak an neih theih nana hetiang hun tha leh hlu tak an buatsaih leh chu lawmawm a tih thu a sawi a. He Summit-a thupui ‘Build a strong future’ tih pawh Resource Person a nih anga sawiin, he huna zirlai kalkhawmte chu an nih tum (aim)-ah tun atanga an kalkawng tur hriat tan tum turin a fuih a. Zirlai naupangte chu eng dinhmunah pawh ding se ‘Lungpui pawh lungte in a kamki loh chuan a awm thei lo’ tih angin hna leh eizawnna kawngah sang leh te lua a awm loh thute, an zirna hma lam hun atana an ngaihtuahna chu a pawimawhzia leh chu chuan thil a tih theih zia te a hrilh bawk a ni.

Resource Person dang Serchhip SP, Gavit Gogna IPS pawhin Zirlai naupangte chu an kal zelna tur atan pawimawh hrang hrangte hrilhin, UPSC leh Civil Services Examination kalphung hrang hrangte Powerpoint Presentation hmangin a hrilhfiah a, Dr. Fabian Malsawmkima MBBS, Serchhip District Hospital leh Govt. Serchhip College-a Assistant Professor Dr. Zarzosanga te pawhin thupui hrang hrang hmangin zirtirna an pe a ni.

Chawhnu lamah ‘Mahni inhriat leh Mahni tan kawngsial’ tih chu thupui-ah hman ni ve lehin he hunah hian Chhang ur/siam (Bakery & Confectionery), Thing deh (Carpentry), Lo/Huan thlai chin (Farming) leh Lawng-a hnathawh (Cruise Ship Attandant) chungchang zirho a ni leh a, mithiam hrang hrang ten heng hna thawk duhte tana hriat tur pawimawh hrang hrangte an zirtir bawk a ni.