Darlawng M/S kum 25 tlin lawmna Bialtu MLA in hmanpui
Darlawng Middle School Silver Jubilee lawmna hunah hian Minister PC. Vanlalruata chuan School tana tha leh zung lo sengtu, harsatna tam tak paltlanga he School in hma a sawn theih nana tha leh zung thawhtu zawng zawng te inpekna ropui a tih thu sawiin, khawtlang nu leh pate pawh he School-a kal zel theihna turin thahnem ngai taka thlawp chhunzawm zel turin a sawm nghal bawk a. Zirna hian kan dinhmun leh kan nih phak loh thleng min nih tir theih thu pawh sawiin, sawrkar hna ringawta innghat lo tura zirlaite chu a chah bakah lehkhathiam chuan hna dang pawh thawk se an tan thil tih a awlsam thin tih hre reng turin a fuih nghal bawk a. Hetiang hun lawmawm an tawng thei hi Pathian hnenah lawmthu sawi tura chahin, School tha taka a kal zel theih nan duhsakna a hlan bawk.
Darlawng Middle School hi kum 2000 a din niin a tirah Zirtirtu mi 5 ten bul an tan a, tunah hian Zirtirtu mi 8 awmin zirlai thahnem tak an nei bawk a, nimin-a he hun hman ah hian Zirtirtute leh he School-a lo thawk tawh te bakah zirlaite leh khawtlang hruaitute an tel a ni.