Garage atana Roadside hman phalna pek sawiho a ni
Nimin khan Serchhip DC Meeting Hall-ah Serchhip District Management Committee chu an Chairman leh Bawrhsap Paul L. Khuma hova thukhawmin kawng sira lirthei hun (park) chungchang hi sawiho a ni a, The Mizoram Motor Vehicle Amendment Rules 2019, Rule No. 54-in a phut angin Mizoram chhunga motor neitu zawng zawng ten an motor dahna tur Garage an nei vek tur a ni a. Amaherawh chu, kan In sak danin a lo zir tawh loh avang te, mi In luah hawh ten an motor dahna tur an chan ve loh avangte leh thil hrang hrang avangin motor nei si, garage nei si lo engemaw zat an awm tih hriat a ni a. Motor Parking a lo felfai zawk theih nan Serchhip District huamchhunga VC tin ten mahni VC huamchhung theuhah, motor nei si, Garage nei si lo leh luah hawh tur pawh hre lo te chu Roadside Garage (Garage atana Roadside hman phalna) pek nise tih rawtna lut chu sawiho a ni.
He Meeting hian Garage atana Roadside hman phalna pek chungchang VC kuta dah chu tha tiin, amaherawhchu, District Management Committee hian dan anga thuneihna pek theihna an nei em tih chu zirchian ngai an ti a. DC Office-in hei hi an bawhzui dawn a ni.