RD kaltlanga thingtlang hmasawnna Scheme hrang hrang zirhona leh thlirletna neih a ni

Rural Development & Administration Department hnuaia thingtlang lam tih hmasawnna tur leh rethei zawkte’n leirem an rah theihna tura sawrkar flagship Programme hrang hrang zirhona leh hmalakna thlirletna chu nimin khan Department Officer te tan buatsaih a ni.

He zirhona Aijal Club-a neih ah hian National Rural Livelihood Mission (NRLM), Lakhpati didi, Deen Dayal Upadhyaya Grameen Kaushalya Yojana (DDU-GKY) leh thil dangte thlirho niin RD&DA Minister Prof. Lalnilawma chuan a hmanpui a, RD&AD hnuaiah thawktu thar lut leh chhuak tawk an awm reng avangin chak zawka hnate thawh a nih theih nan sawrkar hmalakna leh hnathawhte hrechiang tura inzir thar reng chu thil pawimawh tak a nih thu a sawi a; Mizorama thingtlang khuate tihhmasawn nan Vibrant Village Programme (VVP) chu khaw 109-ah kalpui tan a nih tur thu leh thingtlang khua a chengte leh a bikin nuho te’n eizawnna tha zawk an neih theih nan sawrkar chuan RD&AD hnuaia Mizoram State Rural Livelihood Mission (MzSRLM) kaltlangin, theihtawpa hma a lak mek thu a sawi bawk a. Mizoram-a Self Help Group (SHG) kaltlanga hmalakna hrang hrangte pawh a tarkang bawk a ni.

Tun dinhmunah MzSRLM hnuaiah hian thawktu mi 360 awm mekin, State Level-ah mi 39, District Level-ah 25 leh Block Level-ah mi 296 an awm mek a, post za zela 90 hnawhkhah niin India rama titha berte zingah Mizoram chu a awm mek a; Self-Help Group hi 11,257 awm mekin Village Organization 759 leh Cluster Level Federation 84 a awm a; Lakhpati Didi (SHG member kum khata Net Income cheng nuai khat chunglam nei) mi 13,552 an awm mek a ni. Chak zawka hma lak zel tum a ni a, hemi atan hian DDU-GKY hnuaiah kawng hrang hranga thingtlang mite intodelhna tur leh thiam thil zirna tur - Training Manual te, Standard Operating Procedure te leh Skill Development Programme hrang hrangte duana, tihchangtlun mek zel a ni bawk.

DDU-GKY Programme hi Mizoram State Rural Livelihoods Mission (MzSRLM) hnuaia program pawimawh tak niin, he Scheme in a a tum ber chu thingtlang thalai kum 18-35 inkar ami ten eizawnna ngelnghet an neih theih na tura Skill Training pek a ni a. DDU-GKY hnuaia training te hi a thlawn vek niin, Trade hrang hrang- Guest Service Associate (F&B Service), House Keeping Assistant, Domestic Data Entry Operator, Airline Cabin Crew, Retail Sales Associate, General Duty Assistant leh a dang te a training theih a ni. Tun dinhmun ah DDU-GKY hnuaiah thalai training chhuak tawh 3652 awmin, heng zinga mi 2136 te chu Mizoram chhungah leh India ram khawpui hrang hranga 5-Star Hotel leh Resort-ah te, Company leh BPO lian tak takah te, Airline Cabin Crew te leh India ram a Airport lian tak tak ah te an thawk mek a ni.