LADC Inthlanpui vawi 12-na December 3-ah neih a ni dawn

Lai Autonomous District Council (LADC) Inthlanpui vawi 12-an chu thla thar December 3 khian neih a ni dawn a, December 9, 2025-ah Vote tla te chhiar tur a ni ang.

Mizoram State Election Commission chuan nimin khan thuthar thehdarhtute kawmin LADC Inthlanpui neih hun tur hi a puang a, ruahman lawk ang chuan LADC Inthlanpui vawi 12-na neih tur atan hian nimin, November 7. 2025 khan inthlan puan niin hriattirna pawh Returning Officer ten an tichhuak nghal a, inthlan chuh tum te tan tun thla, November 14, 2025 (Zirtawpni) tlai dar 3:00 thlengin hming pekluh theih a ni ang. Inthlan chuh tum te tana hming pekluh chu hemi ni vek hian enfiah nghal a ni anga, hming pelut zinga inhnukdawk duhte tan November 17, 2025 (Thawhtanni) chhun dar 12:00 thleng hun hawngin hemi hnu hian Candidate te list tarchhuah nghal a ni anga, December 3, 2025 (Nilaini) zing dar 7:00 atanga tlai dar 4:00 thlengin Vote thlak a ni anga, Vote tla te chu December 9, 2025-ah chhiar tur a ni ang. Engemaw avanga Vote thlak that ngai a awm a nih chuan December 4-ah Vote hi thlak leh tur a ni bawk ang.

Lai Autonomous District Council (LADC) Inthlanpui vawi 12-na hi MDC Bial 25-ah neih tur a ni dawn a, vote nei mi 56,873 awmin an zinga 27,854 chu mipa niin midang 29,019 chu hmeichhia an ni. He inthlanna neih turah hian Vote thlakna khawl, Electronic Voting Machine (EVM) hman tur niin inthlan neih tur puan anih rual hian Model Code of Conduct (MCC) chu hman nghal a ni bawk. Lai Autonomous District Council term hi kum 5 (nga) niin tuna thlantlin te pawh hi kum5 chhung atana thlan tur an ni ang.