Rajasthan Minister hovin RGSA hnathawh rawn en

Rajasthan sawrkar-a Panchayati Raj changtu Minister Madan Dilawar leh amah zuitu Official te bakah Panchayati Raj member hrang hrang mi 21-te chuan Mizoram rawn tlawhin nimin khan Rural Development Department Minister lah Official te an kawm.

Ministry of Panchayati Raj (MoPR) hnuaia Scheme pawimawh tak, Rastriya Gram Swaraj Abhiyan (RGSA) hnuaia Mizoram-a hnathawh hrang hrangte en thlitlai paha Mizoram-a rawn zin Rajasthan Minister leh midangte hian nimin khan RD&AD Minister Prof. Lalnilawma chu a Pisa-ah kawmin sawrkar hmalak dante an sawiho a, he hunah hian Prof. Lalnilawma chuan Mizoram ngai pawimawha rawn tlawhtu Minister Madan Dilawar leh amah zuitu Official-te’n hetianga intlawhchhuahna hun an rawn nei chu lawmawm a tih thu sawiin, ram leh ram intlawhtawna, inzirtawn thin chuan rah tha tak a chhuah zel a beisei thu a sawi a; thingtlang hmasawnna atana hmalakna hrang hrangah te pawh hna thawh dan tha zawk leh chin dan tha zawkte (best practices) chharchhuaha, in-share tawn zel theih a nih tur thu sawiin, lawmawm a tih thu a sawi bawk.

He hunah hian Rajasthan Minister of Panchayati Raj Madan Dilawar chuan Mizoram-a RD&AD ten an lo dawnsawn dan chu fakawm a tih thu sawiin, Minister zuitu mi dangte pawhin Mizoram chu nuam an tih thu leh sik leh sa mai bakah ramngaw, thing leh mau te chu hmuhnawm an tih thu an sawi a, Mizo mipuite hawihhawmna chu mawi an tih thu pawh sawiin, Rajasthan tlawh ve thuai turin RD&AD Minster leh a thawhpuite chu an sawm nghal bawk a ni.

Nimin-a inkawmna ah hian Mizoram-a RGSA State Programme Manager John Lalnunsanga chuan Rastriya Gram Swaraj Abhiyan (RGSA) hnuaia Mizoram-a hnathawh hrang hrangte leh hmalak dan te a tarlang a. He hun an hman zawh hnu hian Madan Dilawar-a leh a hote hian Reiek leh Ailawng-a RGSA Scheme hnuaia hnathawhte tlawh lehin, sawrkar hmalakna hrang hrangte an thlirho bawk a ni.