Mamit District-a hman tur MMU Van vailiam a ni

Mamit District-a hman tur ‘Mobile Medical Unit Van’ (MMUV) chu nimin khan Health Minister Lalrinpuii chuan MINECO-a a Office atangin a vailiam.

Nimin-a Minister in a vailiam Mobile Medical Unit Van hi TATA AIG General Insurance Company Ltd. leh Swasti - The Health Catalyst-ten CSR Fund an pek atanga ruahman a ni a, he Motor Tata Yodha Pick up hi cheng nuai 12 man niin damlo enna khawl X-ray leh Test chi hrang hrang enna bungrua cheng nuai 26 chuang hmanga thuam a ni a. Mission Foundation Movement (MFM) chu Implementing Agency niin, NHM nen tangkawpin Mobile Clinic hi neih thin a ni ang. MMUV hi Mamit District-a Doctor leh damdawi In awm remchan lohna khaw hrang hranga tlan kual tur niin Doctor, Nurse leh Medical staff te nen heng khaw hrang hrang te hi an fangkual thin dawn a ni.

Nimin-a MMUV vailiamna hunah hian Minister Lalrinpuii chuan Mamit Aspirational District-a hman tur MMUV tha tak TATA AIG leh SWASTI-te zara neih a ni chu lawmawm a tih thu sawiin, Mission Foundation Movement (MFM) hmalakna avanga sawrkarin CSR hrang hrang an dawng thin pawh lawmawm a tih thu a sawi bawk a. He Project hian sawrkar, Private Company leh CSO-te an thawhho chuan rah tha a chhuah thin tih a lantir tih sawiin, MMUV hmang hian thingtlang kilkhawr leh damdawi In pan harsatna hmunah te awlsam zawkin mipuite an inentir thei dawn a ni, a ti a. He Project-ah hian Regular Health Camp telin, hei hian natna awm thei ven kawngah te, Counselling leh damdawi In lian zawka a hun taka in refer nan te a tangkai tur thu a sawi bawk.

He hunah hian TATA AIG leh SWASTI aiawhte pawhin thu sawiin, an Company hmalakna leh hnathawh te an sawi a, Commissioner & Secretary Lalengmawia chuan a kaihruai a ni.