Mizoram-ah Cooperative hlawhtlin lohna chhan tur a awm lo - Larsap

Mizoram Larsap General Vijay Kumar Singh chuan Mizo khawtlang chu tunhma atang tawha thawhhona tha nei a nih avangin Mizoram-ah Cooperative hlawhtlin lohna chhan tur a awm loh thu sawiin, loneitu leh rethei zawkte Cooperative harhtharna hmanga chawikan tuma theihtawp chhuah a tul thu a sawi bawk.

International Year of Cooperatives 2025 pualin NABARD Mizoram Regional Office chuan nimin khan Aizawl-a Hotel Regency Conference Hall-ah 'Cooperatives Build a Better World' tih thupui hmangin ‘Cooperative Conclave 2025’ an buatsaih a, he hun hi khuallian nia hmanpuiin Larsap General Vijay Kumar Singh chuan khawtlang thuamchak leh tihhmasawn kawnga Cooperative-te hmalakna fakawm a tih thu sawiin, Mizo khawtlang chu tunhma atang tawha thawhhona tha nei a nih avangin Mizoram-ah Cooperative hlawhtlin lohna chhan tur a awm loh thu a sawi a. “Hmanrua, inkaihhruaina leh hmalakna enzuina tha bakah tun aia taima lehzuala tanlakna hmangin Cooperation harhtharna hlawhtling tak kan kalpui thei a ni,” a ti a. India chu khawvela Cooperative inzarpharhna ram lian ber a nih thu leh Cooperative Society nuai riat leh singli, member vbc. 29 awmna a neih mek thu sawiin, MPACS, FPO leh SHG te tha taka an kaihhruaia, thil dehchhuah hralhna tha tak an ruahman sak phawt chuan kawng hrang hrangah hmahruaitu kan ni thei tih a sawi a. Thlai tharchhuahte a hringa hralh mai bakah, a sawngbawlna lam kan uar deuh deuh a tul thu sawiin, Organic thla tharchhuah tam deuh deuh a tul thu a sawi bawk.

Larsap chuan February, 2023 atanga kalpui MPACS tihhlawhtlinna kawnga Mizoram hmalaknate tarlangin, hmun kilkhawr leh kalpawh harsa zawkah te pawh PACS Computerization Scheme hlawhtling taka kalpui a ni chu lawmawm a tih thu a sawi a, March ni 31, 2026 ralhma ngeia MPACS 216 din hman a nih ngei a beisei thu a sawi a. Cooperative Society hrang hrangah rintlak leh langtlanga hna thawh a pawimawh tih pawh sawiin, MPACS tum a hlawhtlin theih nan hmeichhia leh thalai tam zawk an tel a tul thu leh, ram leilung tichhelo zawnga hmalak a tul thu a sawi a. Kalkhawmte chu loneitu leh rethei zawkte Cooperative harhtharna hmanga chawikan tuma theihtawp chhuah turin a chah bawk a ni.

He hunah hian Cooperation Department changtu Commissioner & Secretary, Udit Prakash Rai pawhin Cooperative Sector tana 'State Cooperative Policy' siam chu peihfel thuai a nih dawn thu a sawi a. Right of First Refusal kaltlangin MPACS-te thliarfel an ni tih sawiin, Federation dang - MULCO, PIGFED, POULTRYFED leh ZOFISHFED-te tanpuina tur pawh ruahmanna ah hian telh a nih thu a sawi a. Ministry of Cooperation kalphung thar hnuaiah digitization-in nasa taka hma a sawn thu pawh tarlangin, tun dinhmunah PACS 24 chu online-a kalpui a ni tawh a, kum 2027-ah chuan PACS zawng zawng computerise vek turin chak taka hmalak mek a ni, a ti bawk.

Cooperative Conclave 2025-ah hian NABARD Mizoram Regional Office-a GM & OIC Pankaja Borah-i chuan inlawmna thu sawiin, T. Lhungdim, GM & OIC, RBI Aizawl Office, Mayur Bora, Author, Social Commentator & Former Development Banker leh MPACS hotute hnen atangin thusawi ngaihthlak a ni bawk.

Larsap hian NABARD siam 'MPACS Awareness Video' a tlangzarh bakah MPACS hna thawk tha, Khanpui MPACS Ltd., Luang-mual MPACS, Champhai LAMPS leh Champhai Town MPACS Ltd. te hnenah chawimawina thuziak a hlan a. Registrar of Cooperative Society John LT. Sanga chuan lawmthu sawiin, Agriculture Secretary Ramdinliani, Horticulture Secretary Maria C.T. Zuali, Cooperative hruaitute leh hemi lam kaihhnawih hrang hrang aiawhte he hunah hian an tel bawk a ni.