One Day Media Conclave – Vartalap neih a ni

Information & Public Relations Minister B. Lalchhanzova chuan nimin khan Aizawl-a I&PR Auditorium-ah Ministry of Information and Broadcasting hnuaia Press Information Bureau (PIB) buatsaih ‘One Day Media Conclave Vartalap' - thupui hrang hrang zirhona hun chu a hmanpui.

He Conclave-ah hian GST dan thar chungchang leh kumin-a kum 150 tling, National Song ‘Vande Mataram’ bakah Adi Karmayogi Abhiyaan chungchang zirho a ni a, Minister B. Lalchhanzova chuan Vartalap chu sawrkar laipuiin hnam inpumkhatna atana a hmalakna kawngah thil pawimawh tak a nih thu sawiin, National Song Vande Mataram chu India mipuite min phuar khawmtu leh ram dang hriat phaka India mipuite chawisangtu a ni, a ti a, Vande Mataram chuan India hmasawnna a thlen tih sawiin, ram inpumkhatna atan a pawimawh thu leh Ram leh Hnam inpumkhatna chuan khawvel thang mekah ngaih pawimawh a hlawh zel dawn tih a sawi bawk.

I&PR leh Printing & Stationary Department changtu Minister B. Lalchhanzova chuan GST dan thar chu a tirah huphurhawm viauin lang mahse mitin nunphung ziaawm na tur zawk a nih thu sawiin, Mizoram ei leh bar dinhmun thlak danglam thei a ni tih a sawi a, hei hian hmasawnna lian zawk a thlen dawn thu leh mipui mimir khawsak harsa thlengin a tha zawngin nghawng a nei tih a sawi a. Chhiah chu hremna dan nilovin chhiah pe theia awm chu malsawmna zawk a nih thu sawiin, ram tan mipuiten hna an thawk ve a ni tih lantirna a nih thu a sawi a. Mizoram-ah pawh chhiah mumal taka lak anih theih nan theihtawp chhuah a ni tih sawiin, sawrkar laipui ring ringawt lova mahni inchawm zo ve thei turin zawi zawia tan an ngai tih a sawi bawk.

Mipuiten sawrkar laipui Scheme ngaih pawimawh a ngaih thu pawh Minister chuan sawiin, hamthatna awm thei leh hmasawnna thlen thei hrang hrang ngaihven a pawimawh thu a sawi a, sawrkar laipuiin hnam hnufual chawikan a ngai pawimawh thin chu lawmawm a tih thu pawh sawiin, tunlai thiamna leh khawvel hmasawnna kawnga intlansiakna kawngah midangte ban phak turin nasa takin a puih thu a sawi bawk.

Nimin-a he hun hman ah hian Commissioner of State Tax, HK. Lalhawngliana chuan ‘GST Reforms 2025’ zirhona hun buatsaih a ni chu lawmawm a tih thu sawiin, September 2025 atanga hman tan, GST 2.0 kalpui a nih hnuin Mizoram-a Tax lakkhawm a than zel thu a sawi a. Mizoram-ah chak lehzuala chhiah khawn hna kalpui mek a nih thu leh dik tak leh a hun taka chhiah lakkhawm a nih theih nan ‘Quick Response Team’ pawh din a nih thu te a sawi bawk.

He hunah hian zirlaite leh thuthar thehdarhtute telin mithiam hrang hrang ten zirtirna an pe a ni.