NMBA kum 5 tlin lawmna Minister hovin lo zawm a ni

Nasha Mukt Bharat Abhiyaan (Drug Free India Campaign)-in kum 5 a tlin lawmna chu nimin khan Prime Minister Narendra Modi hovin Amritsar-ah neih a ni a, Mizoram atangin Health Minister Lalrinpuii hovin Online hmanga lo zawm a ni.

Sawrkar laipui-a Ministry of Social Justice & Empowerment buatsaih NMBA kum 5 tlina lawmna Amritsar-a neih ah hian sawrkar mi pawimawh thahnem tak an tel a, Mizoram-ah chuan Aizawl-a Lianchhiari Rûn atanga lo zawmin Health Minister Lalrinpuii chuan ruihhlo do chungchanga hriattur pawimawh leh mi tin mawhphurhna te a sawi a. Mizoram sawrkar ang pawha tlawmngai pawl leh Kohhran te nen tangho a ruihhlo chu nasa taka do a ni tih sawiin, Zirlai rual kalkhawmte chu ruihhlo laka fihlim zel turte, ruihhlo chu mihring hmasawnna daltu lian ber leh nun titawitu a ni tih hre reng turin a chah a. Mizoram chu a awmna hmun avangin ruihhlo in a run nasa bik hle tih tarlangin, a dolet tur leh nakin thlenga ram leh hnam hma hun vawngtu tur chu Vawiin-a zirlai leh thalaite an ni tih a sawi a ni.

Nasha Mukt Bharat Abhiyaan hi India ram chhunga State 28 leh Union Territories 8-ah kalpui mek niin District zawng zawng a tuam chhuak vek bawk a. District tina Deputy Commissioner te kaihhruaina hnuaiah ruihhlo la ti ve lote venhim an nih zel theih nan leh a ti tawh ten enkawlna an dawn theihna turin hma an la mek bawk a ni. India ram hmun hrang hranga mi a tam thei ang berin nimin-a hun hman hi an chhim theihna turin online-in buatsaih a ni a. Sawrkar department hrang hrang, zirna In hrang hrang te leh ruihhlo dona atana thawktu NGO pawl hrang hrangte pawh sawm an nih angin online in an tel a ni.

Nimin-a NMBA kum 5 tlin lawmna Mizoram-a neih ah hian SWD changtu Commissioner & Secretary Lalzarmawii chuan Nasha Mukt Bharat Abhiyaan chungchang leh an hmalakna te a tarlang a ni.