Mizoram Legislative Assembly Member atan Dr. R. Lalthangliana chu lakluh a ni ta

Mizoram Legislative Assembly Speaker Lalbiakzama chuan 2-Dampa (ST) Assembly Constituency By-Election a thlantlin Dr. R. Lalthangliana chu nimin khan Mizoram MLA ni turin rinawmna thu tiam tirin a lalut.

MLA thar lakluhna inkhawm hi nimin chawhma dar 11:00 khan Aizawl-a Assembly Conference Hall-ah neih niin Assembly Secretariat-a Addl. Secretary Lalthangmawia chuan a kaihruai a, he hunah han Speaker chuan MLA atana thlan thar Dr. R. Lalthangliana hi India Danpui hnuaiah rinawmna thu tiam tirin a lalut a ni. Nimin-a MLA thar lakluhna hunah hian Chief Minister Lalduhoma, Home Minister K. Sapdanga, Health Minister Lalrinpuii, School Education Minister Dr. Vanlalthlana, Assembly Deputy Speaker Lalfamkima, Leader of Opposition Lalchhandama Ralte bakah MLA te an tel a. MLA atana Dr. R. Lalthangliana lakluh a nih hnu hian Seat 40 awmna Mizoram State Legislative Assembly-ah Mizo National Front (MNF) chuan MLA 10 an nei ta a. Rorellai ZPM Party in MLA 27 la nei zuiin BJP in MLA pahnih leh INC in MLA pakhat an nei a ni.

Mizoram MLA atana lakluh Dr. R. Lalthangliana hi August ni 6, 1956-ah Lunglei District-a Zotlang khua ah a piang a, a pa chu R. Dengchhunga (L) a ni. Kum 1982-ah Ngurmawii Sailo nen inneihin fapa pahnih -Dr. Vanlalchhanhima Ralte leh Rev. Samuel Vanlalawmpuia (tunah Ph.D a ti mek) an nei a. An chhungkua hi Kohhran leh khawtlanga inhmang tak an ni a, a nupui Ngurmawii Sailo hi MHIP General Headquarters, Aizawl-ah President term hnih, Senior Vice President-ah term khat leh Vice President-ah term khat chelh tawhin, tunah hian Vice President nihna a chelh leh mek a. Anmahni In Kanan Veng, Aizawl-ah an cheng mek a ni.

Dr. R. Lalthangliana hian kum 1974-ah Serkawn Christian High School atangin HSLC a pass a. Kum 1978-ah St. Edmund's College, Shilong atangin BA a zo leh a, kum 1980-ah MA (Sociology) First Class-ah NEHU atangin a zo leh bawk a. Kum 1982-ah NEHU hnuaiah M.Phil Grade 'A' ah zovin. kum 1986-ah Ph.D a zo leh a. NEHU Sociology Department-ah M.Phil zo hmasa ber leh Ph.D Degree la hmasa ber a ni a. M.Phil-ah hian Special stipend hmu phak khawpin a titha a ni a. NEHU hnuaiah hian Mizo zinga Ph.D zo hmasa ber a ni bawk.

Kum 1986-ah Mizo National Front (MNF) Party a zawm a, party chhungah nihna pawimawh hrang hrang chelhin thalai (MNYF) President leh General Headquarters-ah Vice President nihna te a lo chelh tawh a, tunah hian MNF Party-ah hian Sr. Vice President a ni mek a. Term 6 zet MLA ni tawhin heng zinga Term 3 ah hian Cabinet minister a ni a, kum 1989-1993, kum 1993-1998 leh kum 2008-2013 khan MLA niin kum 1998-2003, kum 2003-2008 leh kum 2018-2023 khan Cabinet Minister a ni.