Adviser to CM (Finance) atangin banna thehlut; Chief Minister in a pawm loh thu a sawi

Finance chungchanga Adviser to Chief Minister atana ruat TBC. Lalvenchhunga MLA chuan Adviser to Chief Minister a nihna atangin banna a thehlut a. He banna thehluh hi a pawm loh thu Chief Minister Lalduhoma chuan nimin khan a sawi thung.

Thudawn danin November 17, 2025 chawhnu khan TBC. Lalvenchhunga hian Chief Minister hnenah Adviser to Chief Minister atanga banna hi thehlutin ZPM Party hruaitute a hriattir bawk a. Thuthar thehdarhtu ten a ban chhan an zawhnaah chi hnih a nei tih sawiin, MLA a nih angin Legislator tih tur leh telna hrang hrang - Assembly Standing Committee panga (telin)-ah a awm a. Bial nei a nih avangin a Bial tan hun a hman a ngai bawk a. Finance leh Planning bikah Chief Minister puih a tulna leh sawrkar tana a tih tur tul zual a sukiang tawh ni ah a ngai tih a sawi a. Hetiang hi a nih tawh laiin amah bik chu Chief Minister Adviser neih tul ti lo leh senso hautak thu sawi kawnga an sawrkar chirhthehna ah a hming sawirik tel a nih ziah avangin Adviser atanga chawlh tawh chu a tha zawkin a hria tih a sawi.

A pahnihnaah chuan, ZPM party tan a tulna apiangah hun tam zawk hman theih a duh a, chumi atan chuan an hotute pawh a dil tel nghal tih sawiin, Party tana nasa zawka inhmang tur chuan CM Adviser a nihna anga tih tur tul a tam avangi, chawlhsan tawh a duh tih a sawi bawk.

Zawhna chhangin TBC. Lalvenchhunga chuan, CM Adviser dangte chu an hna chanpual leh ruat an nih chhan a inang lova; a ni chuan a harsa zual sut ngai a sukaw khat tawha a ngaih vangin chawlh a duh a; Adviser dangte erawh CM leh sawrkar tana an pawimawhna a la awm avangin an chawlh ve kher tul tihna a nei lem lo tih a sawi a ni.

Chief Minister Lalduhoma chuan Adviser to Chief Minister TBC. Lalvenchhunga’n Adviser to Chief Minister a nihna atanga banna a thehluh chu a pawm loh thu nimin-a thuthar thehdarhtute zawhna chhangin a sawi a. Chief Minister chuan Adviser to CM TBC. Lalvenchhunga’n banna a thehlut nia sawi chu a dik leh dik loh an zawhna ah Chief Minister chuan a banna chu a pawm loh thu a sawi a ni.

TBC. Lalvenchhunga hi Aizawl West-I bialtu MLA a ni a; Chief Minister in Adviser mi panga (5) a neih zinga pakhat niin, Finance chungchanga Chief Minister puitu, Adviser to CM (Finance) a ni mek a ni.