MCC bawhchhia a CM puhna la chhui zui zel

Dampa Bial Assembly by-election atana vote zawn vanglaia Chief Minister Lalduhoma inthlan dan (Election Model Code of Conduct) bawhchhia a puhna hnuhnung zawk chu Election Commission of India in a bawhzui zel.

Chief Electoral Officer (CEO) Pisa atanga thudawn danin Election Commission of India (ECI) hian CEO lamin an ngaihdan an thehluh chu a chiang tawk lova an ngaih thu an rawn hriattir a. Silsury khua a Chief Minister thusawi – ‘Hruaitu hmasate’n Mizo mipuite leh Chakma inkarah inhuatna chi an lo tuh a, hruaitu hmasaten Chakma huat dan min lo zirtir tawh thin a ni,’ ti a sawi nia MNF Legal Board-in an puhna chu ECI hian a ngaimawh hle nia thudawn a ni a. Chutih rualin CEO Pisa lam sawifiahna hi chiang tawk lova ngaiin a rawn zawt chiang leh mek a, a thusawi ngai ngai ziahchhuah (transcript) thehlut turin CEO Pisa hi a rawn hriattir bakah Lalduhoma thusawi khan MCC bawhchhiatna emaw, Representation of People Act.1951-in a khap, chi leh chi inkara inhuatna thlen thei lam hawi a ni em tih chungchangah emaw CEO Pisa ngaihdan fel tak ECI chuan a hre duh bawk a, zawhna eng engemaw an la rawn zawt zui reng a ni.

Tarlan tawh angin MNF vekin MCC bawhchhia a Chief Minister an puhna hmasa zawkah khan ECI chuan rorellai ZPM chu a rawn kamkhat tawh a. Dampa Bial by-election inthlan Campaign lai a cheng vbc. 770 senga tuikhuah tum a nih thu Chief Minister Lalduhoma’n a sawi sawifiahna chu pawm lovin ZPM President chu an Star Campaigner-te reng reng an thusawi kawnga fimkhur turin a hriattir bawk a ni.