Kumin December thla-a Winter Festival hman tur Krismas lam hawia hun duan a ni dawn

Tourism Minister Lalnghinglova Hmar chuan Mizoram-a khualzin tam zawk hip luh an nih theih nan Mizo thil ngaisang a, lawm a, chawilar zel tura thalaite chahin, December ni 15-23 chhunga Winter Festival hman tur chu Krismas lam hawia hun duan a nih thu a sawi bawk.

November ni 13-15, 2025 chhunga Kawmzawl (Pukpui, Lunglei)-a Rimawi Kutpui, Leitlangpui Music Festival (LMF) 2025 kharna hun Inrinni, Nov. 15, 2025-a neih a hmanpuina ah Tourism Minister Lalnghinglova chuan Mizoram hmun tina mite chu intlawhtawn sup sup a, hunpui leh hun bil (event) buatsaih a, chumi kaltlang chuan tualchhung mite ipteah sum a luh a, ram eibar dinhmun (economy) chawikan chu Tourism-in a tum a nih thu sawiin, Event tha, khualzin hip thei buatsaih zel tum a nih thu a sawi a. December ni 15-23, 2025 chhungin Aizawl-ah Winter Festival buatsaih tum a nih sawiin, Krismas lam hawia hun duan a, Krismas Carol leh Krismas Costume Parade te buatsaih tum a nih thu te a sawi a. December ni 31-ah a huhovin Mizo thalaite tan Sakawrhmui-tuai Sunset programme buatsaiha kum hlui ni tla thlir liam tum a nih thu pawh a sawi a. Mizoram-ah kum hlui thlaha Tourist hip thei turin ruahmanna siam a nih thu sawiin, Mizorama khualzin tam zawk hip luh an nih theih nan Mizo thil ngaisang a, lawm a, chawi lar zel turin thalaite a chah a. Lunglei chu Mizoram rimawia sulsutu, Serkawn Concert lo chhuahna a nih angin Leitlangpui Music Festival pawh a par vul zel dawn a ni, a ti. 

Leitlangpui Music Festival 2025 hi Tourism Ministry atanga sum hmuh cheng nuai 25 leh Mizoram sawrkar atanga sum hmuh cheng nuai 25, a zavaiin cheng nuai 50 bakah sumdawng leh Agency hrang hrang atanga tanpuina (sponsor) sum hmuh hmanga buatsaih a ni a, stall hrang hrangte mipui tlawh theih leh dawr theiha hawn a nih bakah zan lamah zaithiam hrang hrangte an zai thin a. Leitlangpui Band Contest neih nghal niin Knot (Aizawl) chu pakhatna an ni.